Friday, February 10, 2012

افلا يبصرون! افلا يعقلون!

جربت تكلم و تتناقش مع حد فلول او حد غير موؤيد للثوره, غير موؤيد للحريه. انا جربت

- طب معلش وحده وحده و ارجوك ما تقاطعنيش و انا ها سمعك للأخر منكن
- طيب
- حضرتك ليه مش عاجبك المظاهرات؟ نقطه نقطه قولى سبب واحد. اهم سبب
- علشان معطله البلد
- ايوه معطله ايه بالظبط؟
- كل حاجه. اول حاجه بتعطل المرور
- تمام. لو الرئيس, ابن الرئيس, اى وزير كان معدى من الشارع مش بيوقف الدنيا كلها و حضرتك مش بتنطق و لا تقدر تتكلم. لما الناس تعمل كده علشان حضرتك ما تتعطلش بعد كده تانى يبقوا غلطانين؟
- يا سيدى سيبك من الشارع. الأنتاج. احنا البلد بتقع.
- معاك, قصدك بأيه البلد بتقع؟ البورصه بتاعت الأغنيا و لا المصانع الماليه البلد و مقطعه الدنيا انتاج؟ 
- لأ انا قصدى المواطن العادى ال باليوميه. حرام عليكوا.
- تمام و انا معاك مالوا بتاع اليوميه ما ينزل, ايه ال مش بينزلوا لما يبقى فى مظاهره؟
- يا بيه السرقه و تكسير المحلات
- و انا معاك. مين المسؤول عن حمايه الحجات دى كلها؟ و حمايه المواطن؟
- الشرطه؟ بس انتوا مش مدينها فرصه حضرتك
- اه ده قصدك سنه مش كفايه علشان تسيطر على بلد؟
- .....
- طب لو كده ما نجيب حد يدربهم او حاجه لأن كده مش صح. شرطه بقالها سنه مش عارفه تشتغل!
- يا بيه مانتوا فى المظاهرات بتقرفوهم و نفسيتهم باظت
- اه طيب خلينى اقولك حاجه. انت عارف ان الشرطه و الجيش مفيش مظاهره عرفوا يفضوها من غير ما يقتلوا الناس من ساعه 25 يناير. ده دلوقتى لما بتعدى على خير اى مظاهره بنستغرب ازاى ... يا سيدى الفاضل كل العالم بيحصل فى مظاهرات و بيسمعوهم و يشوفوا عايزين ايه و لو ها يضطروا يفضوها, بيفضوها انشاله اقصى حاجه يضربوهم بميه و يزقوهم او يضربوهم ضرب بنى ادمين مش حيونات و ده غلط برضوا بس مش بيموتوا الناس. احنا شوف بلدك قاتله كام واحد لحد دلوقتى
- يا بيه واحنا عايزين البلد تشتغل بقى 
- يا سيدى البلد تشتغل ايه؟ هوه فى مصانع و لا اى شغل و الشباب قال لأ؟ طيب قبل ما الناس تقعد تقول نشتغل نبنى البلد وفروا شغل مش كده و لا ايه؟ و لا ها نشتغل بعض!
- ...........

و الغريب جدا ان فى ناس تتكلم معاها ساعات و الفى دماغها فى دماغها

Sunday, February 5, 2012

التار

"قوللنا مين القتل و ملكوش دعوه. احنا ها نخد حقه. مش ها نسيب حقنا"
قال احد اهالى الشهدا فى مذبحه الأولتراس فى بورسعيد من امام مشرحه زينهم

و كان الناس بتسأل زمان هوه ليه فى الصعيد بيلجأوا للتار و كان اهل المدن بيسألوا ازاى كده و ان ده مش صح و مش تحضر. 

ليه فجأه دلوقتى بقى الناس بتستقوى بمنطقتها و بلدها و عيليتها و ظهرت كلمه "الحق" و "التار" و "المسؤول" و كل يوم بنشوف خناقات و سيوف و مطاوى
الاجابه: علشان مفيش عدل.

مفيش قانون بيتطبق على المجرم ... 

مفيش شرطه ال ده المفروض دورها انها تضبط المجرم و تطبق القانون عليه

للأسف القانون و الشرطه و موؤسسات الدوله دلوقتى بتحارب المتظاهرين و طالبى الحقوق علشان طمع فى السياسه (سياسه المدنين) مش بتستخدم انها ترد الحقوق و علشان كده فى تار و فى انتقام و بنسرع فى سكه بلد بلا قانون ... قبليه

قبل ما تسأل ليه الناس بتقول ها تجيب حقها و تارها اسأل لو همه ما عملوش كده مين ها يجيبلهم حقهم

و الحق يعنى العدل