Tuesday, August 21, 2012

عفواً انها سينما مصريه مقرفه


السينما فى مصر للأسف الشديد اصيبت بعقم و ده نتيجه لعقود من التدهور. اصبحت السينما عباره اما عن واقعيه (مأسويه مقرفه و فى معظم الأوقات مبالغ فيها) او علاقات حب مكرره و غير منطقيه او ضحك فقط بلا هدف. 

و اكتر من كده، فى اتجاه شائع ان السينما يجب ان تتجمد فى الأنماط التلاته دول! و في معظم الأحيان هذه الأنماط التلاته يكونوا هدفهم اعطاء رساله او درس للمشاهد. زى كن صالحاً او الست نص المجتمع او اسمع كلام بابا و ماما علشان انت ما تعرفش حاجه او المابيصليش بيروح النار او الكباريه حرام و لازم يولع و امثله كتير... 

الغريب ان محدش سأل نفسه ايه دور السينما او لماذا صنعت؟ او ليه الناس بتتفرج على افلام من الأساس؟ 

من وجهه نظرى و لا اجذم انى صح بس السينما هى "وسيله ترفيه" زى الكتب و الموسيقى و الرقص و الغناء. استخدمت كتير جداً فى التعليم فى بدايتها و تدعيم ايديوليجيات سياسيه و دينيه لكن فى الحاضر و من فتره لا تقل عن ٥٠ سنه او اكتر بدأت السينما تتحرر من الدور "الغامض" ده و هاقول ليه انا شايفه غامض. و بدأ يظهر الجانب الترفيهى الممتع المبهر فى السينما و الممتع و المبهر مش مقصود بيها الكوميدى بس. المقصود بيه ابهار افلام فى الأنيماشن و الرعب و الخيال و الأفلام البتخلى الواحد يفكر. افلام زى Lord of the rings, Avatar, Titanic او حتى Saw و امثله كتير جدا جدا عن افلام مبهره 

"الغامض" مقصود بيها سؤال واحد موجه لصانع الأفلام الموجود بيها رساله؟ حضرتك "مين" علشان تعلمنى؟ مش ممكن تكون بتعلمنى غلط؟ ايه يضمن انك صح و انا غلط؟ و سؤال لصانع الأفلام الواقعيه المُره زى الأفلام المنتشره فى مصر حالياً. ايه يضمنلى انك بتقول الحقيقه و مش بتبالغ؟ ايه مصادرك؟ هل هي مصادر موثوقه؟ لأن لو معرفش يجاوب يبقى بالظبط زى اى حد بيطلع اشاعات... 

مش بقول تحت اى مسمى ان اتجاهات السينما فى مصر غلط بس بقول انها بعدت عن دور السينما فى الأبهار و الترفيه و مسكت و "تبتت" فى اتجاهات معينه و "هرت" فيهم لحد ما بقت اتجاهات عقيمه، مسفه، و هبله. و على اد ما صناع الأفلام بيحاولوا اكتر يبينوا الواقع الأليم على اد ما هم فى الحقيقه بيبعدوا عن الواقع الأليم و يقربوا اكتر من خيالتهم المريضه العنصريه المبالغ فيها.


السينما للترفيه و الواقعيه و الكوميدى نوعان مش اكتر و مش لازم تاخد درس من فيلم و لا لازم تتعلم منها و تاريخ الأفلام المصريه فيه كل الأنواع الأفلام من افلام فيها استعراضات و رقصات جميله و رعب و خيال و واقعيه و تاريخيه و حتى Abstract و انواع كتير جداً، ايه الحصل! 

مش قادر افهم...

1 comment: