Saturday, August 18, 2012

بطلت اكتب

ليه بطلت اكتب؟ 

علشان مش عارف اكتب ايه! اكتشفت ان كل الشارع "محلللين" و دى حاجه تسترعى الأنتباه. احنا يا مصريين بنموت فى تحليل الموقف، يعنى مثلا

لو شفت حادثه، ها تلاقى كل الحواليك فى اى مكان مجموعه تحليل و تعليق على الحادثه. ها تلاقى جدال على مين الغلطان و كل واحد يدافع عن رأيه (المبنى على مشاهده جزء بسيط جدا من الحقيقه، ال هيه الحادثه) بشده و عنف و ثقه. 

لو حصل خبر سياسى زى الرئيس عمل او سوى، تانى يوم لو واحد فتح الموضوع فى اى مكان ها تلاقى كله بيحلل و يدافع و يختلف و يبرر و يجادل و ممكن في بعض الأحيان يتخانق، زى ما تقول كله مستنى التانى يفتح الموضوع علشان يقول رأيه! 

و امثله كتير و انا كمان بحس برغبه دفينه فى كل موقف انى احاول اقول رأئيى فى البيحصل بس ابتديت احس انى بعيد كل البعد عن الحقيقه علشان "اقول رأى" و ادافع عنه. فا بصعوبه بحاول اسكت. 

الموضوع ملوش علاقه بالثوره، الثوره غيرت بس مواضيع النقاشات، بعد ما كانت "الأسعار" و "الزحمه" و "كام نقطه علشان المنتخب يتأهل" اصبحت "الأخوان" و "الثوره" و "البلد"...

يمكن قله المعرفه و الثقافه بتخلى الواحد عايز اى مصدر للمعلومات حتي لو مغلوط، مش كامل، مزور او غلط يثبت بيه انه موجود و ليه رأى،

بس للأسف السكوت فى مجتمعنا ضعف... 


No comments:

Post a Comment