Saturday, June 25, 2011

انا لا اخجل و لو بتخجل, ايه يعنى, متخجل

ابدع زى ما انتا عايز و لكن الحريه تتوقف عند انه يدرس او لا يدرس

بكده انهى الأخ الصحفى الخجول حواره على قناه أون تى فى 

الأخ الصحفى شايف ان لازم نمنع تدريس قصه قصيره من منهج اداب قسم اللغه الأنجيزيه علشان فيها مشهد جنسى (خلينى افكركوا انها قصه قصيره, يعنى مش صور ولا فيلم اباحى) فى الوقت ال فيلم زى عماره يعقوبيان اتعرض و كان من اقوى الأفلام فى السينمات

بغض ال نظر عن تدخل شخص لا يمتلك ولا الخبره و لا ال درايه الكافيه انه ينقد عمل ادبى من الأدب الأنجليزى قال الصحفى ان كتير من البنات بيتكسفوا من المناهج, طيب ايه ال مقعدهم فى الكليه؟ ما يحولوا؟ قسم مكتبات جميل و مفيهوش حاجه عيب او مثلا اجتماع او تاريخ بس لو تاريخ يا ريت ما يدرسوش التاريخ اليونانى او الرومانى عشان ما "يخجلوش". 

هوه لو طالبه فى كليه طب بتكسف منكن تطلب من العميد عدم اظهار العضو الذكرى او رؤيه جثث؟؟ علشان هيه بتخجل؟ 

طيب ينفع واحد مبيفهمش فى الطب يتدخل فى الملوش فيه و يقول للدكاتره ما تدرسوش الحجات دى علشان بنتى بتخجل؟ 

طيب ما لو اداب قسم انجليزى فيها حجات انت بتختلف معاها ما تسيبها. هوه ليه كل واحد بقى يتدخل فى ال ملهوش فيه و يقول انا مش عايز طلبه اداب قسم اللغه الانجليزيه يدرسوا ده او عايزهم يدرسوا ده, عفوا هوه حضرتك مين علشان تقرر؟؟؟

احب انهى المقال ال كتبته و انا دمى محروق بكلام الأخ الصحفى قى تعريف الأبداع

وجهه النظر تتوقف عند اخلاقى و عند دينى...

و احب ارد, مع كامل احترامى ليك انت حر من حقك ان القصه ما تعجبكش او ان اى حاجه ما تعجبكش بس مش من حقك انك تمنع اى حاجه تختلف معاها, لأن بعيد عنك فيه حاجه اسمها حريه الأبداع و حريه تدريس الأبداع فى مدرسه الأبداع ال هيه كليه الاداب قسم الأدب الأنجليزى

زى ما بندرس الموسيقى فى معهد الموسيقى و الرسم فى كليه الفنون (هل لما يرسموا امرأه عاريه او رجل عارى علشان عيب بالنسبالك نمنعهم؟)

من فضلك لا ترجعنا للعصور الوسطى

الله يرحم محمد على باشا, كان زامنه مات مشلول لو شاف الفيديو ده

Monday, June 20, 2011

المواطن الخفى

هو مواطن غير موجود فعليا

مواطن بيركب جنبك فى الموصلات و قليل اوى لما تلاقيه بيتكلم فى اى موضوع

لما يبقى فى خناقه فى الشارع, يفتح المواطن الخفى الشيش و يتفرج بدون صوت علشان محدش يشوفه... بس ماهو حتى لو حد شافه ايه ال هيحصل مش هيشفوه, ما هو خفى

حتى لما بيزعق و يتنرفز اما يفيض بيه محدش بيسمعه و لو سمعوه بيبقى صوت بس مفيش صوره

مواطن ماشى جنب الحيط و بيقول يا حيطه دارينى

دايما خايف, من كل حاجه... من الحياه من السياسه من الموت من الحب من الضياع من قلت الفلوس من الفشل

فى منهم نزل التحرير بس كان مستقوى بالزحمه و منهم فضل انه يبقى خفى و يكمل خفى

محدش يعرف اسمه, و هيعرفوه اسمه ازاى اذا كان هوه مش موجود

بيحاول يتكيف مع ال حوليه و مقتنع انه ميقدرش يغير مفيش فى ايده حاجه يعملها

لو واحده اتضربت قدامه و اغتصبوها هيقولك و انا هعمل ايه! هيضربونى... و يفضل خفى

وجوده زى عدمه

و يعيش و يموت مواطن خفى لم يضيف اى شىء و لم يؤثر فى حد

دليل الحاكم الماهر للقضاء على الثوره

بعد خطاب بشار الأسد و محاولته تقليد النموذج المصرى للقضاء على الثوره حسيت ان نفس السيناريو بيتكرر. بعد نجاح (هندله - handling) الثوره فى مصر قرر بشار تقليدنا. ده دليل ل أى حاكم يبقى فى بلده ثوره. دليل سهل و بسيط و اثبت كفائته


دليل الحاكم الماهر للقضاء على الثوره



- بعد الثوره مباشره ابدأ فى التهديد. استخدم المصطلحات الأتيه (يد من حديد) و (لن نتهاون) و (نحذر)

 - لو لقيت نفسك بتخسر (جيب وراه). و قول زى بشار كده (الدوله كال أم او الأب) أو (لن اموت الا على تراب بلدى) و كرر اسم البلد كتير

- فورا ابدأ فى التخوين استعمل (كنتاكى) او (اطماع خارجيه)

- شتت الناس. اسأل اسأله تحسس الناس انهم م اشتركوش فى الثوره زى القذافى (من انتم!) (وين كنتم!) او فرق بينهم و قول كلمات زى (قله مندسه) (ايادى خفيه) و اسأل على المواطن الفقير ال هيتضر بسبب الثوره (المواطن الفقير ال عمر ما حد بسأل عنه

- اعرض الحل بشكل اسأله تفرق بين الناس زى مثلا
انا انوى الأصلاح و موافق على ارأكم بس ايه رأيكوا دستور جديد و لا نصلح فى الدستور القديم؟
طيب بتحبوا الريس ده و لا ده؟
نعمل سلام مع البلد الفلانى ولا نحارب؟ 
الناس هتحتار و تبدأ فى الأختلاف و يتشتت انتباههم عن اسباب ثورتهم و تبدأ الخلافات و التقسيمات

- قول كلام محدش يفهمه بس يفزع زى (انهيار اقتصادى) (ميزانيه الدوله) (الفوضى الخلاقه) (اعمال الترهيب)

- دايما ابدأ كلامك بتمجيد للثوار. حسيسهم انهم جامديين اوى و انهم نجحوا و عملوا كل حاجه (طبعا انته بتاكل بعقلهم حلاوه بس هوه ده احسن حل للتعامل مع الثوار الزنانين)

- حط حلول بس خليها بعد مده يعنى (لم اكن انتوى) و ادونى ست شهور او ادوا لوضع الدستور تلات شهور. و حط حاجات من مطالب الناس الأساسيه بعد المده الطويله دى, ده هيديك فرصه انك تلم الناس ال مضايقاك و تظبط التظبيط و حيلينى بقى لما تنفذ حاجه

- المماطله - دى كلمه السر. لازم تستغلها صح. يعنى لو قولتلك هات الفلوس ال عليك قولى انهى فلوس؟ هوه انا خدتها امتى؟ طب اثبت؟ يوم الحد و لا السبت؟ انته بتسألنى ليه؟ ليه معملتش محضر؟ و ده كان الساعه كام؟ و افضل سفسط و لوك لوك لما ازهق و اقولك يخلى يلعن ديك دى فلوس مش عايز حاجه


دى كلها حاجات مجربه و اثبتت فاعليتها. امشى عليها و هتدحك على اى شعب. و ادعيلى

امضاء فاعل خير

Sunday, June 19, 2011

بيقولوا

بيقولوا

سمعنا عن ثوره كبيره قامت فى مصر
بيقولوا كان
فى ظلم طاغى
وكده خلاص فلوسنا رجعت
ال سرقوها زمان
بس الحقيقه فلوسنا دى ما شوفنهاش
يمكن عشان
احنا مش عايشين فى مصر

فى بيوتنا فى
تلفزيونات
باسلاك طويله
ممدودات مالبلكونات
وفيها ناس بتقول ضميرنا خلاص صحى من السبات
و لما بمشى فى الشوارع بتشتم و باتضرب
يمكن عشان
ضميرنا مات

جيرانى ناس
على اد حالهم
و احنا ناس على اد حالنا
بنشتغل علشان نعيش
ناكل نعيش
و ننام نعيش, ما بنشتكيش
ليه نتظلم؟
يمكن عشان
ما بنشتكيش


عايشين فى شارع
فيه شباب
عايشين حايتهم عال القهاوى
و جريهم وراه البنات
و لما تسأل حد فيهم ايه شغلتك؟
يشرب فى شايوه و يبتسم و ما يجاوبش
يمكن علشان
القطر فات؟

بيقولوا فى
ناس زعلنين من الحياه
علشان قست
ع الخلق و الأيام خلاص ما بقتش ترحم,
ال جيبه فلوسه راحت
حتى ال جيبه فيه فلوس
 الحياه بتمد ايدها و ما بتسيبوش
يمكن عشان
الحياه ما تعرفوش 


كتبها

احمد مجدى


© Ahmad Magdy - 2011




الطبقه الوسطى تحت شعار - عيش و سيبنى اعيش

الطبقه الوسطى بدأت تنافس الطبقه الفقيره فى الساحه بعد سنوات من قرب اختفاء هذه الطبقه ال (ماشيه جنب الحيط) مش معاهم مليارات ولا حاجه بس عندهم بيت و اتنين او بيت و عربيه و فلوس فى البنك و بيدرسوا و يتفسحوا و يدخلوا على النت و كتير منهم مثقفين

الطبقه الوسطى مش بتعرف تتعامل مع الطبقه الفقيره, بتحاول تتعايش معاها بشكل او بأخر... لكن يقدروا يتعاملوا مع الطبقه الغنيه

مصر بقت ساحه تنافس و فرض سيطره... كله بيحاول يفرض سيطرته

سواقيين الميكروبصات و البياعيين عايزيين يسيطروا على الشارع و ده بقى سهل بعد ضعف الشرطه. بيفرضوا السيطره بالدراع... مواطن الدرجه الوسطى عايز يوصل بيته بأسرع و قت بأقل خسائر و اقل مشاكل  و يكمل تعليمه و كورساته و خروجات و يحضر حفلات و ندوات 

هل دى هيه الطريقه المثلى للتعايش فى مصر؟

انا بستعجب اما اتفرج على الأفلام الأبيض و اسود و الاقى الفقير عايش و الخريج الجامعى عايش و الأتنين بيحترموا بعض و الغنى برضوا كان واخد موقعه العالى فى المجتمع. ما بيبانش احساس النفسنه الطبقيه بين الطبقه الفقيره و المتوسطه زى دلوقتى

مظلومه؟ ايوه الطبقه الفقيره مظلومه, بس فى وسط شره الفقرا و ابناء الطبقه المتوسطه و الأغنياء للفلوس داسوا على الأخلاق و الدين و الرحمه و كل الحجات ال كنا بنزعم اننا بنمتلكها. دلوقتى كل الصفات دى بتقلل من قيمه الأنسان المصرى فى وسط صهد الشارع ال مليان ناس بتعض فى بعض علشان تجيب فلوس و لو يطولوا يمدوا اديهم فى جيبك و يخدوا فلوسك هيعملوها

انا حد قالى من كام يوم شوفلى حد فقير يبيع حته من كبده ب 35 الف جنيه

بصراحه انا اترعبت و مقدرتش اتخيل بس ده الواقع

طيب و الناس ال تعطف عليهم بفلوس يروحوا يشتروا بيها ترمادول و يأجروا توك توك و ينزلوا يلفوا يسرقوا الشباب 

الطبقات بتزيد و التقسيمات بتزيد... بدل ما ندور على نقط نشترك فيها كلنا بال عكس بندور على تقسيمات جديده

كله ماشى بمبدأ عيش و سيبنى اعيش