Monday, March 28, 2011

ايوه انا جبت ديس ساتسفايد

الموضوع تحول من شغل عادى فى كول سنتر الى الشغل عند واحد شغال فى كول سنتر 

الواحد ده مهمته انه يخدم واحد مشغله عنده علشان يخدم ناس اشترت المنتج بتاعه, و يخلى العميل مبسوط (جدا)
و يمشوا العميل مبسوط حتى لو بأنهم يدحكوا عليه و يشقلبوا الكلام و يعدلوه المهم العميل يتبسط 

انا اشتغلت كتير فى كول سنترز و اتعاملت كتير مع عملاء و اكتشفت انى بعرف افهم ال قدامى هوه معاه ايه و رايح فين و جاى منين بس مكونتش بعرف احور او اشقلب الكلام 

زهقت؟ اه زهقت, بس اهو شغل و هوه حد لاقى شغل 

قرفت؟ اه قرفت, قرفت من انى ابقى انا فى خط الدفاع للشركه و انا ال اصد كل المحاولات للتقليل من الشركه او الشتيمه فيها او اى حاجه تضرها سواء ماديا او معنويا

بس اهو شغل و السلام و كان رصيدى عند العملاء لما يتسئلوا عليه يقولوا 

مبسوطيين جدا (very satisfied)

الغريب فى الموضوع ان المتوقع من ال على السماعه, الهوه انا يبقى زى الأنسان الألى مفيش مجال للتفكير

بس ف فى سابقه تاريخيه حصل ان ل اول مره فى تاريخى جبت Dissatisfied و لما سمعت الكول لقيت ان الست كانت كله تمام و ميه مي بس الأسعار مش عاجباها

بدل ما اتشكر ان كملت معاها و فهمتها و مرمتهاش على اى قسم تانى فى الشركه (و دى اسهل حاجه) مشيت من الشركه و قالولى اصل انت كنت جبت Satisfied بس قبل كده مش very satisfied فا تاريخك بقى يا برنس!

انا بفكر طيب هوه لازم انا لو سقلونى عن اى خدمه انا مش مبسوط منها و حد رد عليه لعب بالكلام و خلانى مبسوط بس انا بدفع و بكع و الخدمه زى الزفت  

هل المفروض لو اتسألت على خدمه العملاء هقول مبسوط جدا

واضح ان الشركات فى العالم نسيت ان اصل البيع هوه انك تدينى حاجه تساوى ال بدفعه مش تدينى حاجه وحشه و تغلبنى و حد يرد عليه يحسسنى انى مبسوط بطريقته و انساه الخدمه ال هيه الأصل!!!