Tuesday, March 1, 2011

قراميط الثوره!

من هم قراميط الثوره؟

فى ناس هتلقيهم بيقولولك شايف الثوره عملتلنا ايه؟ فوضى و البورصه وقعت و استريحتوا؟ ويقولك الريس بيموت يا حرام و الشرطه سابتنا و مفيش امان و ده كان احسن من القذافى و ال نعرفه احسن من ال ما نعرفوش و ال بيتكسف من بنت عمه يتجوز بنت خاله 

دول بيترد عليهم و تقولهم فعلا انتوا عندوكوا حق مفيش مشكله ان المصرى كان ملهوش كرامه كان المصرى يسمع كل يوم انت مش عارف انا ابن مين. شفتوا الناس بتتعامل ازاى فى المستشفايات الحكومه؟ لو مت يبقى احسنلك. شفت القسم بتتعامل فيه ازاى؟ على رأى عادل امام "شايلينوا من عال ارض شيل .. شيــــــــــل " شفت الشب البياخد الف جنيه و مبسوط و البياخد خمسميه و مبسوط و البياخد ميه و خمسين و مبسوط... فى برضه البياخد على قفاه و برضه مبسوط هوه ده قرموط الثوره. 

من هم قراميط الثوره؟

همه البيقولوا هنرشح علاء مبارك و دى حريه رأى ... فعلا انت حر ترشح و انا حر اقول عليك قرموط 

همه البيقولوا "احنا اسفين يا تامر و هنخدلك حقك" ... فعلا انت حر تعتذر و انا حر اقول عليك قرموط 

همه ال بيرموا ورق و زباله فى الشارع على الرغم من انهم شايفيين شباب و بنات طلع عين اهلهم فى الشوارع بينضفوا البلد ... فعلا انت حر ترمى ورق و انا حر اقول عليك قرموط 

همه ال بيسبتوا الناس فى الشوارع و يسرقوهم و ما يهمهمش اى حاجه عن البلد و لا يفرق معاهم ظروف و لا مصالح و لا يفرق معاهم راجل من ست من طفل المهم يسرقوا فلوس يجيبوا بيها حشيش ... انت مش حر تسرق علشان مفيش بوليس انته برضوا قرموط, لأ ده انت سيد القراميط كلهم

همه الظباط ال لسه بيشتموا فينا حتى بعد كل الحصل و بيقولوا هنرجع تانى نبهدلكوا ... فعلا انت حر تشتمنا ما احنا ورث و انا حر اقول عليكوا قراميط...