Friday, February 25, 2011

ال يمد ايده على سيده, يبقى حر و عنده كرامه

اتعصبت جدا اما شفت الفيديو ده

واحد (باشا) ايا كان منصبه فى الشرطه بيقول (قاصد الشعب المصرى انه اتجرا و عرف حقوقه) ال يمد ايده على سيده تتقطع ايده ؟؟ يعنى ده معناه الحرفى ان البشوات بيحروسو اسيادنا و ها يقطعوا ايد ال ايده تتمد عليهم

يعنى بمعنى اصح كلاب حراسه... 

بس سوء التفاهم هنا فى مين ال اقنع الناس دى بكده؟ زمن العبوديه اللسه فى مخكوا يا ساده خلص و دوسنا عليه بالجزم ال حضريتك بتهوشنا بيها

احنا شعب حر ملوش سيد, اكبر حاجه عندنا دينا و وطنا اكتر من كده و لا يفرق 

عيب اما تبقوا ناس بتعرفوا تقروا و تكتبوا و كاتبين على حوائط مكا تبكوا "الشرطه فى خدمه الشعب" و يقول الباشا ال يمد ايده على سيده و على اساس ان ده شعارهم يرد الكل فى نغمه واحده اكنه كورال مدرسه حضانه 

يتقطع ايده

لأ انا اسف ده عندوكوا انتوا الكلام ده احنا, المصريين الأحرار شعارنا

ال يمد ايده على سيده, يبقى حر و عنده كرامه

Wednesday, February 23, 2011

القذافى مش ريس, ده ملك مجنون

هوه لو حد زى القذافى ماسك ليبيا بقالوا اتنين و اربعيين سنه و بالجنون ده يبقى ازاى حد منكن يصدق الخطاب التهريج ال قالوا امبارح ده!

يعنى ايه يهدد شعبه كده؟ يعنى ايه قال انه لو كان رئيس كان رما الأستقاله فى وش شعبه؟ و يعنى ايه يقول شعبه انه ها يستخدم القوه ضد شعبه؟ (على اساس انه لسه ماستخدمش)

هوه واضح ان فى الدول العربيه الحكام حاسين ان الشعوب دول ملكيتهم و بتوعهم لقوهم فى الشارع... 

حد زى ده لازم يتعدم. و انا متأكد لو بقى فى رؤساء شعوب عربيه, الشعوب هيه ال مختراهم هيكونوا قوه هايله. اتحاد دول عربيه زى الأتحاد الأوروبى هنبقى قوه هايله. انا متأكد من كده, الشعوب العربيه شعوب قويه. ثائره. لو استغلوا ده فى الصناعه و التجاره و كله التوازن هيتغير فى العالم.

انا متأكد ان مفيش رئيس بعد كده هيفتكر ان الشعب شغال عنده. العكس الرؤساء همه الشالغلين عندنا. 

انشاء الله هتولع ياقذافى. يا مجنون  

Monday, February 21, 2011

تحذير - نظرا لعدم وجود شرطه ارشادات لتجنب السرقه

خلى بالكوا فى طرق كتير دلوقتى بيستخدموها الحراميه

للبنات:

- خلى بالكوا من اى موتوسيكل او تك تك. لو سمعتوا صوته وراكوا امشوا على الرصيف او ابعدوا عن طريقه (علشان دول بيسرقوا الشنط و يجروا)
- خلى الشنطه مفيهاش حاجات مهمه ارجعوا تانى لجيب البنطلون او اى جيب و دايما خلى الشنطه مش ناحيه الشارع او اتجاه العربيات
- ال self defence ده تلعبى بى او تزينى بى اى رف او تخليه لو واحد بس غلس عليكى او كده, لو لقدر الله حصل حاجه يا تصوتى يا تجرى
- بلاش تمشوا فى شوارع فاضيه و لا بليل و لا بالنهار الا لو مضترين اوى

عربيات: 

- تحت اى ظروف لو مايه او اى حاجه اترمت على ال قزاز تحت اى ظروف متوقفوش فى نفس الوقت اصبروا شويه و وقفوا بعدها بشويه علشان ده بيبقى حد قاصد يوقف االعربيه

- كل شبابيك العربيه تبقى مقفوله فى اى لجنه شعبيه, هوه بس الشباك ال جنبك

الولاد:

ربنا يتولانا  

Sunday, February 20, 2011

لو كنت رئيس لمصر بعد الثوره - مشكله الموصلات

الموصلات:

اول حاجه هعملها ها درس الدول ال عندها عدد سكان و زحام زى مصر و ازاى قدرت تتغلب عليها

مثال, لما بصيت لحالة كوريا الجنوبيه لما استضافت كاس العالم و هيه اصلا عندها ازدحام زى القاهره و يمكن اكتر و ازاى اتعاملت معاه فهمت ان الموضوع محتاج فكر


بدأ فى 2004 ...

- لغوا كل الموصلات و فكوا الكبارى الدوريين و رجعوا للشوارع الأصليه (كل الناس قالوا عليهم عبط)
- و حدوا المواصلات فى اتوبيسات بس و طبعا فى تاكسى بس ده مش موضوعنا. 
- عملوا الأتوبسات اربع الوان على حسب المسار و ليهم الشمال بتاع الشارع بس بتاعهم
- كل اوتوبيس فيه سنسورsensor (جهاز بينقل مكان كل اتوبيس لمركز رئيسى)
- و فى جهاز اتصال (ارسال و استقبال) فى كل اتوبيس و بيبان فى المركز الرئيسى على الخريطه مين مزود فى السرعه و مين متأخر و كده
- على مل محطه فى لوحه مبرمجه تقولك الأتوبيس الجاى اى نوع و فاضله اد ايه عشان يجى ف لو مستعجل تركب المترو مثلا او كده و لو قرب تستناه
- فى كروت زى بتاعت ميناتل كده بتديك تخفيض على الأتوبيس و المترو, ف حضرتك لما تركب فى ماكنه بتفتحلك الباب فى المترو و الأتوبيس و الماكنه دى بترجع بينات عن الأماكن ال محتاجه اتوبيسات اكتر و الأماكن ال مش محتاجه للمركز الرئيسى ال فيه ناس قاعده بتنظم الدنيا و قدمها خريطه فيها كل الأتوبيسات و كاميرات فى الشوارع. ف لو مثلا فى الخريطه فى زحمه فى حته يبصوا فى الكاميرات و يكلموا المرور يظبطوها... 

اشكال الأوتوبيسات اهيه


و المشكله اتحلت عندهم

مش بقول نقلدهم بس انا مثلا لما فكرت قلت ها عمل مسابقه و الجائزه كبيره و احنا عندنا ناس بالهبل عندها افكار و المسابقه فى مصر و بره مصر و كل واحد بيفهم فى المواصلات و حل الأزمات يقترح مشروع بتكلفته بجدول زمنى بكل تفاصيله

و لو صرفنا مليار من المليارات المسروقه دى ها ترجعلنا بعد المشروع ده لما كله يعرف يروح شغله و البلد تبقى مفتوحه

و انا متاكد ها تتحل الأزمه. و اهو مجرد حلم