Thursday, February 17, 2011

نداء لكل مصرى واعى, لسه فى اجندات

ل كلاب الشائعات ال عايزه ترجعنا تانى

مش ها نرجع تانى

بعد ما مليتوا الفيس بوك اكاذيب و هبل و كل الكلام ال كان بيتذاع على التلفزيون المصرى

مش ها نرجع تانى

حاولوا تبعدونا عن الهدف ال كل الشعب نفسوا يحققه بمواضيع فرعيه (وائل امريكى, مين القائد, فين الريس؟ البرادعى؟ موسى؟ مين هيمسك؟ مين فين ليه؟

برضوا مش ها نرجع تانى

طلعوا القطط الفطسانه فى الدستور و اقنعوا الشباب ان الخنائات ال بتعملوها على الفيس بوك دى هتغير حاجه. على فكره كل ال هيتغير فى الدستور هيبقى بالتصويت. ابقوا ادفعوا زى زمان.
 
مش ها نرجع تانى

انا برضه كنت بقول انتوا اختفيتوا فين! طلعتوا مستخبين بتجهزوا للحمله دى على الفيس بوك و بحب اسمى الحمله دى حمله "بتوع كنتاكى"

لكن متقلقوش لسه فى ناس مثقفه و بتفهم و عارفه ان دلوقتى احنا بنحط اساسات و مش سهل تكسير شجر فاسد جذوره ممتده. مش سهل. بس هيحصل. طول ما احنا واعيين و عارفيين احنا رايحيين فين و جايين منين

مصر مش ها ترجع لورا  تانى, 

و الا هتبقى النهايه



انا لو وائل غنيم ده ديانته ماجوسى و من اسرائيل برضه بحترمه و بشكره

ال انا شايفه ان كلاب الأشاعات اتحركت من التلفزيون المحلى للفيس بوك 
 
انا شايف ان الناس بكل سهوله مش بتفكر و بترفع حد السما (مع انه مطلبش كده) و بكل سهوله بتنساله اى حاجه قالها و عملها
 
انا و لا اعرف وائل و لا يفرق معايا هوه بيفكر فى ايه بس ال شايفه انه مقالش انه زعيم, مقالش انه عايز حاجه و مستواه مش طالب مساعده 
 
ليه نعينه زعيم مع نفسنا كده و نرجع نقول مش عازينه زعيم و ناس تطلع تقول لأ ده ماسونى و ناس تقولك اسرائيل و امريكا زقينه 
 
طب سؤال, دى وجهه نظرى الشخصيه 
 
مشوفتوش اسرائيل مخضوضه ازاى و امريكا متوتره ازاى؟ 
 
انا شايف ان فى حاجه قمه فى التحضر حصلت و وائل حد ظهر زى كل الناس ال اساميها اتقالت فى وسط الثوره 
 
غريب اوى لما نتريق على الناس ال صدقوا كنتاكى و صدقوا العملاء و بيسيبوا الثوره و التغيير و الدنيا و مركزيين مع واحد مقالش انه زعيم و كان دايما يطلع الناس ال معاه و هوه اول حد قال انا مليش فضل 
 
بجد حاجه مش قادر افهمها و يا رب كلاب الأشاعات يتعاملوا معامله اشاعات كنتاكى
 
و نفكر ازاى احنا رفعنا واحد مطلبش ده و عيناه رئيس و متحدث و بعدين شتمناه و قلناله انه عميل و طلعناه كافر 
 
نفسى نبص قدامنا و نضرب الكلاب بالطوب. الكلاب ال نفسها ترجع ماضى فاسد "مش هيرجع"
 
بحترم اى شخص ساهم فى الثوره و لسه فى ناس عقلانيه و مبيدحكش عليها. ناس مش بتوع اجندات و لا كنتاكى ولا ماسونيه و لا ماجوسيه و لا تاموره 
 



Wednesday, February 16, 2011

بلد بدون شرطه

البلد دى لحد دلوقتى مفيهاش بوليس, تمنتاشر يوم...

و الغريب انى لما نزلت بالشارع حسيت بالأمان, لما كان فى بلطجيه فى عربيات بيضربوا نار اتعرفت على جيرانى الوقفوا فى الشارع ماسكيين حجات اول مره يمسكوها فى حياتهم

لما بنزل الشارع الشباب بتنظم المرور و لا احسن ظباط

البياعيين وقفين باحترام, كله بيحاول يقنع نفسه ان الدنيا لسه ماشيه

حتى الضايعين البيحششوا و بيغنوا فى نص الشارع ما ضيقوش حد... 


بسمع ان فى ناس كتير بتقول مفيش امن بس انا شايف غير كده, مش بقول ان الدنيا ينفع تمش بدون شرطه بس السؤال هوه

انا ليه مش حاسس ان الشرطه مش موجوده, مع انها مش موجوده؟  


Sunday, February 13, 2011

البوليس الجديد - حلمى


قعدت افكر ايه البوليس ال يحفظ للبلد كرامتها الداخليه و يحفظ لى انا كمواطن كرامتى فكرت فى الأفكار دى 

- تغيير الزى الرسمى (مش هتفرق ايه بس علشان تكسر المنظر القديم و تبدأوا عصر جديد) و منع ان اى حد انه يلبس مدنى الا فى ظروف خاصه جدا و محدده 
- تحديث اقسام البوليس شكلا و مضمونا 
- و جود اجراأت جديده للتعامل مع المواطن تحفظ ليه كرامته و كرامة الشرطه 
- عمل مركز خدمه عملاء من افراد شرطه متعلميين للرد على كل البلاغات و الأهتمام بهم جميعا ايا كانوا 
- و جود كاميرات فى اقسام البوليس من جهه تفتيش للتأكد من كشف المخليين بالنظام ال بيسيئوا للباقى الشرفاء
- تعريف الناس بنماذج مشرفه لظباط البوليس من خلال تصوير المطاردات مع اللصوص و المجرميين 
- و جود مكان يتعامل بحزم مع اى ظابط مخالف و طبعا بوجود عواقب على اى بلاغ كيدى و لا يكونوا بأى شكل تابعين للداخليه لضمان الحياديه

طبعا دى اراء و احلامى و اتمنى ان البلد دى تتغير بجد

نفسى ال يوقفنى ينزل هوه من عربيته يقولى 

"مساء الخير. اذيك؟"
الحمد لله
منكن اشوف الرخصه؟
اتفضل
حضريتك كنت ماشى بسرعه جدا خير فى حاجه؟
لأ واللهى اصل مامتى عملت حادثه
انا اسف جدا انا مش هعطلك بس لازم اعمل مخالفه سرعه و هعملها بسرعه بس يا ريت تكمل بالسرعه المقرره علشان ده فيه خطر على حياتك. اتفضل 
انا اسف حضرتك بجد اصلى كنت مخضوض عليها 
لأ مفيش مشكله. ياله الحق روح و انشاء الله خير وما تخافش

تخيل ظابط زى ده؟ اكيد واحد زى ده انا هحتمى بيه لو حصل ليه حاجه و ها خدمه لو احتاج ليه

بحلم 

فشل نظام - شعب و شرطه

اما ببص للثوره و ال حصل بفكر 

كتير ماتوا و منهم ناس من الشرطه بس ال كتير مش فاهمينوا ان ال كانوا لبسين اسود و بيضربونا دول برضوا بيحركهم رؤساهم, اديين من فوق 

مش هقول مين صح و ميين غلط بس كتير مصريين ماتوا و ساهموا بشكل او بأخر فى نجاح الثوره

الشرطه, ايد الدوله ما ينفعش بدل ما نصلحها نقطعها, ما ينفعش 

مش هقول انهم زى ما بيقولوا "كانوا بيضحوا علشانا و كانوا بيخلونا نعيش فى امان مش خايفيين فى الشوارع و كانوا بيحمونا" 

لأ انا اسف, انا كنت بتسبت فى الشارع و عمرى ما افكر اروح للبوليس و لا حد اعرفه. لأ عمرى ما دخلت قسم علشان محدش اعرفه عمل بلاغ على سرقه موبايل و رجعله

بيؤلك اصل فى جرايم اهم زى القتل و المخدرات, بس لأ انا شايف ان كله جرايم و الكل لازم يتحاسب مهما كانت. لازم اما اكلم البوليس الاقى حد مهتم و يساعدنى و يجى بسرعه 

بس بردوا دول زى الموظفين ال بيناموا فى الشغل و بيخدوا رشوه ... مش فشل ليهم بس لأ ده للنظام كله و ده هيتصلح كله - اتمنى 

فكله كان بايظ مش لازم نجيب خروف ... كلنا مصريين و كلنا هنصلح و نتصلح 

لازم نساعد بعض التحول هيبقى صعب بس احنا قده و محدش يسكت على حقه تانى مهما كان