Saturday, February 12, 2011

مصر الثوره



ايوه قدرنا كسرنا حديد
و اتكسرنا و موتنا بجد

ايوه اتولع فى التخليد
و عملناها ثوره بجد

و ال يقولك شعب عبيط
ردنا ثوره و حرب و سد 

مين ها يجرب يجى علينا؟
بعد ما جسر الخوف اتهد

احنا صحيح كنا نفوتلك
لأ مش ضعف ده صبر طويل

كسرنالك كل ضوافرك
يوم واحد وقعنا الفيل

ال مشكله ان احنا وثقنا
ف كهل مهكع مخه عليل

و ال هيمسك حكم الغاليه
 واحد عارف انه اجير

ياخد قبض عشان يخدمنا 
ايوه الشعب مالوهش كبير

ايوه بنعرف نضرب نصمد
بس سلاح السلم خطير  

تنجح ننجح 
نفرح بيك ونباركلك عالتغيير

تفشل تمشى
او ننزل ميدان التحرير

كتبها 

أحمد مجدى 

© Ahmad Magdy - 2011 



Friday, February 11, 2011

مصر بدون مبارك - الرئيس السابق

مصر بدون مبارك لازم تبقى قد المسؤليه, عملنا كل حاجه مش فاضل غير اننا نبنيها من الأول 

بدأناها متحضريين, يبقى لازم نخليها كده,

منكن نحاكم الرئيس, بس مش من التحضر اننا نولع فى بيته او منسيبهوش يعيش فى بلده بحريه 

فى محكمه و ده دورها مش دورنا احنا اننا ننفذ القانون

انا شامم ريحه الأمل, يا رب نبقى قد الديموقراطيه 

و يارب منبقاش بنشمت و لا زى المثل العجل ال بيقع بتكتر سكاكينه. و ياريت نبين اننا عندنا حد منكن يبقى اسمه 

الرئيس السابق  

Wednesday, February 9, 2011

مجنون


مجنون


انا مجنون و جنونى عامينى
ما بشوفشى نهايه و لا حد حامينى

و طريقى نهايتى
و نهايتى طريقى

بخبط فى مبادىء و بدوس احلام
 ما تحسش بيه غير لما بنام

ببدأ فى طرق و اوصل للنص
و فلحظه اسيبها و الكل يبص

و يقولوا مجنون, كان ماشى كويس
ايوه انا مجنون و دماغى مهيس

زى الكاميرا بفضل شغال
و بسجل عال

و فلحظه اتغير و الكاميرا تلف
و ابدأ مال اول و الكاميرا تلف

و اجرى فى طرقى اسرع م الخيل
و احس بتقل الحمل عليا من كتر الشيل

مش ها شرح نفسى و لا اقول ده عادى
م اصل انا مجنون و كمان مجنونه بلادى

و جنونى بيزيد و مفيش فى امان
و جنونى بيزيد و شوارعى كمان 

كتبها 

أحمد مجدى 

© Ahmad Magdy - 2011

Tuesday, February 8, 2011

شوفت الناس ال فى ميدان التحرير فى وائل غنيم!

شوفت الناس ال فى ميدان التحرير فى وائل غنيم!

على فكره هوه مش عبقرى ولا حاجه مميزه هوه كل واحد نزل من بيته و وقف علشان يجيبلنا حقوقنا

مخافوش من الأمن المركزى و عصيانهم و لا من الرصاص و لا من الدخان و لا من الكلاب ال بتخطف الواحد للمجهول

هما عندهم عند كده عجيب و ثقه تكسر الشرطه و النظام (هوه اصلا مكانش نظام)

بجد انا بشكركوا و فخور انى مصرى 

و عايزكوا تمسكوا البلد مين عارف مش يمكن انتوا ال تعدلوا البلد دى؟ و خلى الكبار يريحوا و يسيبوهلنا شويه... 

كفاياهم 

شكرا يا وائل انك وريتنى مين ال واقف فى التحرير 



Monday, February 7, 2011

البلطجيه و انا - مصر


السؤال المهم دلوقتى هوه و بعديين؟ كل يوم نسهر فى الشارع؟ و بشوات البوليس نايميين, مش ها قول انهم كانوا بيحموا الواحد طول الوقت بس الفكره ان الواحد حاسس انه رجع ميت الف سنه لورا

طيب فين البوليس و فين الأمن؟ 

انا قولت ده قبل الثوره, قولت ان زى تونس المشكله فى بعد الثوره. بس تونس لسه فيها امن طيب احنا  امتى البوليس هيرجع. لأمتى هنفضل نسمع ضرب نار فى الشوارع؟ 

انا كلمه بلطجى بقت بالنسبه لى حد مجرم و معاه سلاح آلى و عايز يموتنا. طب هوه السؤال بالمنطق ال طلع من السجن مين اداله سلاح؟ و فرضا اول ما اخد سلاح ايه ال يخليه بدل ما يجرى يهرب, يجى علينا يضربنا بالنار و يحاول يسرق بيوتنا

نرجع نسأل طب فات اسبوع و اكتر, السؤال دلوقتى فين الجيش؟ 

كان فى دبابه و مدرعه فى الميدان بتاعنا, راحوا فين؟

انا النهارده سمعت ميت صفاره و خبط بس ما بقتش قادر انزل ما بقتش عايز انزل, و بدأت افكر ليه انا ميبقاش عندى سلاح. بس لو كل واحد عنده سلاح الدنيا هتخرب. بس انا هعمل ايه! و نزلت فى الأخر, ماهو بيتى...  

بجد انا مش مصدق ال بيحصل و مش فاهم ال بيحصل    

Sunday, February 6, 2011

خايف ثوره مصر تبقى عادى

زى ما كله بيبقى عادى خايف ثوره مصر تبقى عادى

كله بيحاول يبين ان خلاص الدنيا بقت عادى و الحياه حلوه, بس لأ يا رب الناس تكون لسه واخده بالها انها بتغير التاريخ 

تقريبا لحد دلوقتى مفيش حاجه اتحققت 

منكن فى يوم كل ال اتعمل ده بقرار و احد يتغير و بخطاب واحد يعيطوا و ينسوا ان اكتر من خمسين فى الميه فقرا و مفيش كرامه و المستشفيات الناس بتموت فيها و الأنتحار زاد و غيروا 

لكن لو وقفنا هنا يبقى حرام 

التغيير ال الناس شايفاه مش مهم النهارده هيعرى ناس كتير و فساد كتير علشان كده كله هيموت و يسيب الدنياه زى ما هيه علشان يلحق يوضب نفسه و يخلع 

الناس دى ابطال و بتفهم و مبيدحكش عليها 

يارب احنا (ال قاعديين فى بيوتنا) نبقى فاهميين برضه