Saturday, February 5, 2011

بضحك على نفسى, مش عايز اشوف مصر متدمره

بقالى اسبوع دلوقتى قاعد فى البيت مش عايز اسيبه و بقنع نفسى انى خايف على بيتى و بحميه 

لكن اكتشفت انى بحاول اهرب مش عايز اشوف مصر متدمره

مش عايز اشوف مصر منهوبه 

انا شوفت كلاب مسعوره بتنهب مصر كله بيجرى و فى بقه حته من خير البلد دى. كله خايف لحسن بعد التغيير يتمسكوا و يتفضحوا 

مش عايز اسيب البيت و اشوف قسم المنتزه محروق زى ما شوفته فى الصور و مش عايز اشوف الناس ماسكه السيوف فى الشوارع و مش عايز اشوف مصريين بيضربوا بعض 

انا ما كنتش راضى عن البلد بس دلوقتى شوفت الشباب دول ازاى كانوا مكبوتين و ليه متنرفزين

لسه مش هسيب البيت يمكن شاشه التلفزيون ارحم من الحقيقه 

Friday, February 4, 2011

لأ الواقفين دول مصريين اكتر منى

 لأ مش ايرانيين و لا فلسطنين و لا اسرائليين 

هوه عمرو واكد يهودى؟ اهو فى وسطهم ... دول مصريين و عندهم وجهه نظر ليه بنسيب ال بيضربنا و نبص للكرباج؟

شباب عاديين 

زيى و زيك و زى الصور البتشوفها على الفيس بوك 

جربوا معاهم كل حاجه علشان عرفيين انهم صح 

بلطجيه و قتل و مفيش صحفيين و نار 

و شباب واقفه بتسقفلهم و صامده 

و بيتقال عليهم عملاء

و ناس بتقولك "احرقوهم او موتوهم دول قرفونا و شلوا حال البلد" و نسيوا ان دول عملولهم ال عمرهم ما كانوا يتشجعوا و يحلموا بيه 

و نسيوا ان ال شل حالهم هوه "غياب البوليس بتاع البلد" مش ناس واقفه فى البرد ست ايام

Thursday, February 3, 2011

انا حاسس ان الجمعه اخر يوم في مصر

جنود بسيوف ... بقنونهم جهلهم 

مليين الشوارع علشان الكبير اقنعم و نجح فى ده ان السبب فى عدم الأمن و كل ال أحنا فى ده بسبب شباب التحرير

لأ ده بسبب سحب الشرطه, علشان يرعبوا الشعب و يخوفوه 

ما منكن الشرطه تكمل و فى نفس الوقت المتظاهريين يوقفوا فى التحرير

لكن لأ ... انا لحد 7 الصبح شايف صيع محاوطيين المتظاهريين ال معهمش سلاح و بيرموا عليهم طوب و مولوتوف... ضرب نار ... سلاح ابيض

و كله بيتفرج 

كلاب مسعوره محاوطه فريسه ... بس الفريسه مهربتش, تفتكر الفلوس بس منكن تخلى حد يرابط فى مكانه قدام الموت؟ انا معتقدش 

خلاص بقوا مش مصريين و عملاء و خونه. كله بيقول على كله خونه 

انا حاسس ان مصر خلاص ... الجمعه اخر يوم في مصر ... مصر بتموت و الكل مش حاسس 


مش خايف

صدقتك, و كنت هعيت لما سمعت كلامك, حركاتك كانت بطيئه, و اللهى صدقتك 

بس انت خاين و خيانتك كلابك و كلامك سم ك 

هتستفيد ايه ؟ هتستفيدوا ايه ؟

فلوس ... يا كلاب .. هتخلص ... و المعبد هيتهد علينا

مش شايف بكره .. مش شايف غير سور و شوال و طوب سادد بيه الشارع علشان مفيش مجرم هربان فى عربيه سوده لنسر و مسلح و معاه اتنين كمان يجوه يضربوه بالنار

طب ليه يضربوه بالنار؟ 

انا مش خايف ... انا مش خايف ... انا بحلم 

خليكوا اقتلوا و ادبحوا و خططوا و دبروا و بوظوا 

مش طايق اشوفك علشان صدقتك ... و اوعا تلم كلابك بس كلابك هتعضك و هتكلك و هتشلك 

مش بحب مصر
مش بحب المتظاهريين
مش بحب الحكومه 
مش بحب الجيش

مش مصدق حد ... و برضوا هنزل احمى بيتى . و مش خايف