Thursday, December 15, 2011

نعم انا شخص متقلب جدا

نعم انا شخص متقلب و اعترف بأنى متقلب

انا انسان و انتمى الى طبيعه لا تتغير كل لحظه فحسب بل تتغير كل جزء من اللحظه بل و فى اقل من ذلك

الا تنظر حولك؟ الفصول مختلفه, الجو متقلب و انا جزء من الحياه فانا متقلب

لا اعتبرها جريمه بل اعتبرها واقعيه الحياه التى نتفنن فى انكارها

ننكر حيوانيتنا بل و ننكر عقل الحيوانات لنؤكد اننا مختلفين عنهم, نتنصل منهم

انا لا اختلف معك عندما تقول انك شخص غير متقلب و لكنى اسميها ركود

انا متقلب. اسعد و افرح و اقفز فرحا و احزن و ابكى كالاطفال و ارغب فى الأنتحار احيانا و ارغب فى المخاطره و استمتع بالحياه احيانا اخرى

احب و اكره و احب اعدائى احيانا و اكره اصدقائى ايضا

انا متقلب, ككل شىء طبيعى و لا اجدها ميزه او عيب بل اعيش تقلبى, اما انت, فعش ابد الدهر راكد, مكبوت, كالنهر الذى اوشك على الجفاف و يحسب ان اصل الطبيعه الركود


Sunday, December 4, 2011

سفينة شعب

كانوا عايشين على جزيره خلاص الميه هدتها
و غطيطها و جوه البحر شدتها

بس و يوم قام الفلاح عشان يزرع و يروى الأرض
شاف مركب كبيره طولها طول جبال عاليه ده غير العرض

و كان من زمان اهلوه من القهر عماهم البكا و النوح
و كانت سفينه عظمتها و فخامتها بتشبه سفينه نوح

و كل جزيره الفلاح ركبتها فى تمنتاشر يوم
فى الجاب اكله و الجاب شربه و سرير للنوم

ال ركبوها كانوا كتير و الوشوش واحد
فيها اجتمع الفقير و الغنى, مالطريق واحد

فجأه لاحظ الجميع ان السفينه بدون قبطان
لكن الجميع ركب لأن ال مركبش السفينه غرقان

و كان فى شاب بيجرب, يشد حبالها و يقرب
و فك شراعها من بيته لحد مالمركب اتحرك

و شمس الأمل هلت
خلاص المشكله اتحلت


و البحر كان عالى و كانت السما رايقه
و المركب اتحركت بشويش اكنها خايفه و متضايقه

و فى يوم اجتمع عشره و قالوا عمهم ملهم
و يعرف خط سير الريح و السكه مهوا اصل عمهم ملهم

و طافوا و عرفوا السكان
و لزقوا صورتوا فى كل مكان

و كان فى المركب عبيد تتساق
و الزعل قلب بخناق

و كان فى فرق فى الأوزان
فقاموا اقنعوا السكان

و كان فى اخر المركب واحد صياد
معاه سناره و من اول الطريق يصتاد

فقاموا الملهمين اتجمعوا حوليه و اخدوا منه كل الأكل
و قالوا الملهم ده بيفكر و بيتكتك و مش زيك تخين العقل

و كله بطلوا يغنوا من قلت الحيله كمان و اليأس
و القبطان بقى لابد فى قعر المركب و بيجهز لوقت الحسم


و الشاب يسوق ساكت
و شايف الملهمين ساقت

و فجأه طلع القبطان معاه كلابه و زقوا الملهمين فى البحر
و باقى الملهمين يبكوا و يتباكوا من مرار القهر

و سحاب السما بيزيد و معدت الشاب تتكركب
و عال عكس العبيد فرحت و القبطان بقى سموه حامى و منقذ المركب

و علشان المركبه تمشى حاول الشاب يتفاهم مع القبطان و يفهم الكبير بالعقل
و القبطان عايز سلطه فقام فهم عبيدوا ان الشاب ده خاين و جزاته القتل

قام كل العبيد هاجوا على المسكين
و فبل ما يولعوا فى الشاب غرقوه بنزين

بس و عمت الفرحه و عظموه القبطان
و لبسوه تاج و نظاره مع القفطان

مع ان القائد المغوار ما يعرفشى يسوق قارب
لكن العبد حافظ ان ليه قبطان و عمر سيده ما يتحارب

و قعد يوهمهم ان حيتان البحر بتهاجم سفينتهم
و فهمهم انه إلاه بيحميهم  و ان السفينه دى بيتهم


و نسيوا ان فى جزيره
و عايشهم فى ميت حيره

و سما نفسه القاهر ال حرر المركب, الجبار
و همه سموه التنين و سيف المركب المغوار

و همه عاش يخوفهم من الملهم و مالشاب ابو التفانين
و العبيد بقوا بيعشوا بيوطوا و بيبوسوا جذمه التنين

و المركب بقت ماشيه ما تعرفشى شمال من شرق
و الأمطار خرمتها و وجهتها اختفت فى نور البرق

-------
كتبها: احمد مجدى


Monday, November 21, 2011

يا قائد المعركه


يا قائد المعركه, قطر النضال فاتك
اول مدوست زناد سلاح قتلت بيه اخواتك

يا قائد المعركه ما فى شىء هانبكي عليه
طلقه سلاح حضرتك صابت اخوك فى عنيه

يا قائد المعركه, افرح, جنديك صحيح بارع
سحل مرات حضرتك, من شعرها, مسح بيها الشارع

اوعاك تخاف على هيبتك, و اوعاك تخبى, ده كل شىء باين
تاريخنا ما بينساش, و انت خلاص ماليوم اسمك, القائد الخاين

-----------------
احمد



Thursday, November 17, 2011

الحريه اختيار

الحريه اختيار شخصى لا تفرض و لا تنتزع و لا يستطيع اى شخص ان يهبها

الحريه حياه لا يمكن ان تتدرب عليه بل يمكن ممارسته

الحريه هيه عكس العبوديه, ممكن ان تختار ان تكون عبدا لدين, لكن عندما تختار ان تكون عبدا لحاكم ايا كان فانت تدهس حريتك و تعطى الحاكم الظالم صفات الرب و تشرك بدينك

الحريه هيه حريه الجميع, ليست حريه الأغنياء و لا حريه الأغلبيه و لا حريه الرجال ... الحريه حريه الجميع بلا استثناء

الحريه لا يحددها فرد و لا يفرضها على الاخرين

الحريه متعه, فالحر يحترم حريه الاخرين فالأسمتاع بها

الحريه لا تشرح و لا توصف ... الحريه احساس داخلى غير محدود بواقع و لا اشخاص و لا زمن و لا مكان

الحريه اختيار ... و الحر يختار الحريه و لا يرفضها لغيره ايا كان
 
دافع عن حريتك

احمد مجدى


Saturday, November 12, 2011

سياسه السياسه - وجهه نظر شخصيه



 بيشغلونا
و يغفلونا
يستتغفلونا
و يغرقونا
فنبدأ نصرخ انجدونا انجدونا
و قبل ما نغرق ينقذونا 
و يذلوا بقى ميتين ابونا انهم طلعونا
و يقرفونا
و يفرقونا
و يتوهونا
و لما نتوه بيلقونا
و يرجعوا يهددونا 
اننا لو مش هنخرس, ها يغرقونا
عيشه ... مجنونه

اوف اوف اوف اوف اوف
ليه دايما بحس انى مواطن دغف؟
لما افكر فى السياسه بعوز اتف
السياسه يعنى المسايسه
سايس خروفك علشان يعيش
ياكل يعيش
يشرب يعيش 
ما بيشتكيش
و دوخه و استهبله بقرشين حشيش
و حياته تتحول لدايره ما بتنتهيش

و بيجى وقت الخروف يشوف
و يبدأ يلعن الظروف
و يحاول يكتب اعتراض
لكن متأخر يكتشف انه خلاص نسى الحروف
يحاول يجرى
يحاول يهرب
لكن الخروف ها يفضل طول عمره خروف
لكن الخروف ها يفضل طول عمره خروف

-------------------

احمد مجدى - وجهه نظر شخصيه جدا

by © Ahmad Magdy, 12 November 2011


Wednesday, November 9, 2011

السبات العميق - وجهه نظر شخصيه الجزء التالت


فكر فكر
فى المستقبل 
و اجرى و لم و جمع مال
اخطب اتجوز جيب فى عيال
املا الدنيا بزحمه و ناس
اشكى واشكى و قول مش طايق
اشكى و ابكى قول متضايق
قول مش شايف ايه المستقبل
قول مش عارف ايه ال هيحصل
قول مش حاسس بالتغير 
امشى اتحرك يابن الفيل

هز فراسك تبقى موافق
اسمع كلامى و ابقى مطيع
انت فظيع
بتسمع الكلام بشكل مريع
عارف امتى بتفكر تعترض
لما كل الناس تحاول تعترض
لما كل الناس تقولك اعترض
اعترض اعترض اعترض
اعترض اعتراضا افتراضا 
انتحارا اعتراضا يبقى انتحارا
انت حلا هتبطل تفكر
علشان وقت الأعتراض خلص

ليك خمس دقايق تعرتض فى اليوم
بظبط قبل ما تصحى و قبل ما تروح فى النوم
اوعى تفتكر انى برمى عليك اللوم
السبات العميق
السبات الغريق
السبات البرىء
الأنسان المطيع شىء جميل
شىء لذيذ 
شىء رهيب

فكر فى الحب
فكر فى الجواز
فكر فى الشبكه
فكر فى الجهاز
فكر فى الشقه
فكر فى القزاز
فكر فى المزه
فكر فى ال
فكر فى ال
فكر فى ال
لو مفكرتش فى دول,
ها تفكر فى ايه

تفتكر فى ايه؟
تفتكر فى ايه؟ 

-----------------------
احمد مجدى - وجهه نظر شخصيه جدا

by © Ahmad Magdy, 09 November 2011  



 

Monday, November 7, 2011

وجودك نهايتك, نهايتك وجودك - وجهه نظر شخصيه الجزء التانى



وجودك نهايتك, نهايتك وجودك
بدايه نهايتك تؤدى لخلودك
مظبوط؟

مبسوط؟

طب ليه انا حاسس انك انت مربوط
بدايه التفكير هيه دايما فى الوجود
بعدها بتوصل لمين السبب؟
وش
بعدها بفتره تخاف... تكش
بعدها بفتره تبدأ تغش نفسك و الحقيقه
الحقيقه ... مفيش حقيقه

كل واحد فينا ليه حقيقته
اختيارك لحقيقتك يبرر بدايتك
يؤدى لنهايتك
يؤكد حمايتك على طول الطريق
و يؤكد ان كل ال فى المركب مش غريق
يرسم الطريق و يؤكد حمايتك
مالفكار الموازيه لتفكيرك

ال بدأت بنفس الطريقه المنطقيه فى التفكير
فاكر لما قلت مين السبب؟
غيرك برضه قال و عاد نفس السؤال
و وصل لأجابه مختلفه عن اجابتك
مختلفه عن اجابته
مختلفه عن اجابتى
كل ده كلامى
كل دى كتابتى
بطلع فيها كبتى

عارف ان منكن طريقتى تكون غريبه
كئيبه
ارجوك اقرا الكلام متركزش فى التركيبه

وجودك نهايتك, نهايتك وجودك
مين ال فكر و حطلك حدودك؟
انت راضى؟ اكيد انت راضى
هاتكمل معايا؟ اكيد مش فاضى

مش بدور عالسؤال ولا بدور عالأجابه
كل حد شفته ليه منطقه
ليه تفسيراته
ليه غلطته

 مفيش منطق عبيط
كله حلال
مفيش منطق غبى
غير تجاهل السؤال

وجودك هوه نهايتك؟
نهايتك هيه وجودك؟
هوه ده السؤال
ارجوك كسر حدودك

-------------------
احمد مجدى - وجهه نظر شخصيه جدا - الجزء التانى

http://www.nateabell.com


Saturday, November 5, 2011

هيه! - وجهه نظر شخصيه

هيه! - وجهه نظر شخصيه


غطى غطى
همه مش عايزينك تعرفى تقرى خطى

عايزنك غبيه
عايزينك مش ذكيه
عايزينك عفيه, هفيه
و يقولوا ان انتى العقل, لأ انت الطقيه

عايزينك زينه
رزينه, وديما هتلقيهم بيقولوا عليكى تخينه, بدينه, سمينه

هاتليقيهم بيغزلوكى
يستيهيفوكى
يستهبلوكى
و لما يغلبوا, يسترجلوكى

و لو غلطى جوزك يطخك
عايزيين يلغوا مخك

عقدوكى
لونوكى
و فى نفسك شكككوكى
هانوكى
و لجوزك باعوكى

ليه؟ الراجل يبقى بيه؟ و الست تبقى وليه
بيعمل ايه؟
بيهبب ايه؟
بيسوى ايه؟

درسلوك ان العلماء رجاله
العظماء رجاله
السفراء رجاله
الزعماء رجاله
دى ه ب ا ل ه

فهموكى ان دورك دايما جوه البيت
جوه الغيط
وياه السمنه و الجبنه و المحشى و الزيت

لهوكى بالطبيخ
و شم النسيم و البيض و الفسيخ

ازاى تبقى عالمه بجانب كل ده
منكن فعلا تبقى "عالمه" فى شارع الهرم
 و انا عقلى خلاص اتخرم
من كتر التفكير
من كتر التدوير

فكرت فيها كتير
و انا باكل فطير عاملاه ستى الحاجه

الحاجه تبقى تيته
ما تعلمتش
و لو اتعلمت
كانت ما تجوزتش

و جوزها كان مهندس كبير
خطير
سفير
وزير
امير

و هيه تبقى فين من كل ده
هيه جوه المطبخ بتعمل الغدا



,,,,,,,,,,,,,,,,,,,,,,,,,


احمد مجدى

دى وجهه نظر شخصيه جدا


by © Ahmad on Saturday, 05 November 2011

Thursday, November 3, 2011

المهرجنات, يا بتوع الذوق العام

اكتر حاجه بتفقعنى هيه كله "العام" دى كتير من الناس طالعه نازله تستعملها 

الرأى العام

الذوق العام

انا مش شايف ازاى يعنى تعتبر ان كل الناس ذوق واحد او رأى واحد؟

المهرجنات, لل ما يعرفش, هيه الموسيقى ال عالطول بتسمعها معظم الوقت فى التوك توك و التاكسى و الميكروباص و الموتسيكلات (المكن) اليومين دول. هيه عباره عن موسيقى دى جى و واحد او اتنين او اكتر بيغنى عليها


طبعا كتير بيقرفوا و يعيشوا الدور و يقولك ده بيضر الذوق العام. و تردى ثقافى. مين قالك انه بيضر الذوق العام؟ مش بيضرنى خالص و لا بيضر الناس الكتير قوى ال بيسمعوها و بيستمتعوا بيها و مشغلينها طول الوقت و فى الأفراح. ليه مش معتبر كل الناس دى ال بتحب النوع ده من الموسيقى من ال "العام" بتاعتك؟ اظن كل واحد مسؤل عن ذوقه و مدام المهرجنات ليها معجيين و مؤيدين يبقى مش من حق حد يقولك ده تردى ثقافى و الهذى ده. 

و بعديين ده بظبط زى ال يقولك الشعب عايز و الرأى العام عايز و هوه مفيش بتاع الف واحد موافق على كلامه, شغل خرفان صراحه

امريكا فضلت تتبرأ من موسيقى الراب و ده مقللش من الراب بالعكس دلوقتى ده فن و مرتبط بامريكا و مشهور فى كل حته فى العالم و مغنيين الراب عندهم شهره و فلوس و معجبين, ايه رأيك؟ على الرغم ان اصول مغنيين الراب فقيره و اغنيهم فيها شتيمه و كل حاجه. و اول ما بدأت تنتشر كل البلد هاجمتها و قالت الكلام الكبير بتاع الذوق و الفن و كلام العصور الجاهليه ده. دلوقتى بيشغلوا اغنيهم فى معظم الحفلات و الاماكن...

منكن تقول دى موسيقى وحشه, حقك. و منكن تقول دى قرف و كل ال نفسك فيه, بس مش من حق حد ينكر او يحدد ايه هوه الذوق العام علشان مفيش ذوق عام؟ 

ايوه مفيش ذوق عام




Monday, October 31, 2011

ليه بتخلف؟ علشان تقرفنا؟

الغريب فى الموضوع ان فى مصر دايما تحس ان اكتر الأبهات او الأمهات بيحسسوا ابنهم او بنتهم انهم كا اولاد ظهروا فى حياتهم عافيه او مقريفين عليهم حياتهم. مع ان السؤال المنطقى بالنسبه ليه فى الموضوع ده هوه "مين ال جاب مين؟"

الواحد بيفكر طيب هوه انت ليه بتخلف اصلا؟ 

بغض النظر عن الهدف الدينى فى الموضوع و ال هوه اعمار الأرض انا بتكلم فى الهدف الأنسانى ده لو فى ناس مؤمنه بوجود كائن اسمه الأنسان مختلف عن الحيوان ال بيتكاثر و خلاص علشان سلالته ما تخلصشى, طب ما تخلص. و انا مالى؟ و هوه لما السلاله تستمر دى حاجه تفرح؟ ماحنا عمالين نخرب فى الأرض و نبوظ فيها و نلوث و نعربد فيها, ونحارب فى بعض و نموت فى بعض و الناس كتير مش لاقى شغل و كتير مش لاقى ياكل, تفتكر حاجه حلوه اننا نجيب فيها ناس تانيه و بشريه تانيه تكمل مشوار دمار الأرض؟ و لا هتقولى ما هيه الأرض بتاعتنا نعمل فيها ال احنا عايزينه, اه لو كده يبقى عيش بقى و دمر و هيه فى وقت من الأوقات هتتدمر لوحدها. ادينا شوفنا التسونامى و الأعاصير و البراكين و كله و يا عالم ايه كمان.

طيب تفتكر\ى فى لحظه سألت\ى انا هنا ليه؟

الأنسان هنا علشان اهلوا قرروا انه يبقى هنا, "بمزاجهم". لأن هما حسوا انه لازم يبقى هنا, يا ترا ده صح؟ يا ترى من حقهم؟ طبعا هيطلع الرد الجامد بتاع مش همه الجابوا الزريه, ده ربنا الجابها, ايوه مانا بتكلم فى مرحله "القرار" انهم يخلفوا سواء نجح او لأ. اكيد الست مش هتحمل لوحدها؟ مش كده؟ 

بجد انا زهقت و قرفت من الفزلكه بتاعت الأهل و ال لسه مخلفين جديد ال بيقرفوا عيالهم و يلوموهم طول الوقت على وجودهم مع انهم همه الاهل اصل المشكله...

Wednesday, September 14, 2011

شكرا, مش عايز تجديدات فى البلد و لا مبانى شكلها حلو

بعد سنتين من التكسير و التلزيق و التبييض و الحفلطه فى محطه القطر فى القاهره و اسكندريه بدأت احس ان فى استفزاز و كتير مش بياخدوا بالهم... 

انا ما بصتش للديكور و الألوان و العماويد و قولت الله واو ما شاء الله او يشكروا بالعكس, انا شايف تناقض و تهريج 

مش اولى بدل الملايين ما تتصرف فى مبنى شكله حلو محدش ها يستفاد منه اى شىء و بصراحه فى وسط المزبله ال فى الشوارع و المرور المهبب و الزباله ال مش بتتلم اى صرف فى مبانى و جماد من وجهه نظرى ملوش اى تلاتين لازمه و يعتبر سفه و اسراف و قله وعى من وجهه نظرى 

طيب لو الملايين دى اتحطت فى دعم الأكل و قللنا الأسعار مش يبقى افيد؟
لو الملايين دى اتدفعت فى شراء قطارات جديده بدل ال منتهيه الصلاحيه الموجوده و بتعطل دى, مش يبقى افيد؟
لو بنينا بيها مساكن رخيصه للناس, مش يبقى افيد؟
طيب لو سألت مواطن مصرى عاقل و قولتله: نجدد شكل محطه القطر و لا ندعملك الأسعار بتاعت الأكل و اللحوم و الطيور؟ تفتكر منكن يختار ايه؟ 

انا مش قادر افهم تجديد ايه و نيله ايه مش اما الشعب كله ياكل و يلبس و يسكن نبقى نجدد؟ 
مش فيه حاجه اسمها اولاويات؟
حاجه غم, الواحد ها يتشل

Saturday, August 20, 2011

فورمات الأحزاب الجديده

بعد ما بدأت اعلانات الأحزاب تتنطور فى الشوارع و الميادين سألت نفسى, ايه ال فورمات العجيب الغريب ال الأعلانات دى معموله بيه؟ 

اسم الحزب بالحروف العريضه و تحت منه كلمتين صغيريين قوى مثلا (حريه او عداله او مساوه او اى كلام و يسلام لو حطوا كلمه تحرير كمان) و اسم منسق او مؤسس الحزب

بالنسبه ليه و لناس كتير ده مالوش اى تلاتين لازمه

زى اما تلاقى اعلان مكتوب عليه بالحروف العريضه شركه المعمار الجميل قوى للشقق و تحت بحروف صغيره راحه و بلكونات و كلام من ده

تفتكر اعلان زى ده منكن يخلى حد يجرى يشترى من الشركه دى؟ على اساس الشركه مشهوره قوى بسمعتها؟ طيب الاحزاب دى كلها لسه فاتحه تفتكر هتجيب سمعتها منين؟ او حتى يعمل اى حاجه بعد مايشوف الاعلان غير انه يبص و يسيبوا و يمشى؟ بجد ازاى كده

اعتقد ان مثلا لو شركه المعمار الجميل قوى دى عايزه تبيع لى شقق تخلى الأعلان مثلا "شقق جميع المساحات, بلكونات على الشارع, منطقه هاديه, تشطيب فاخر) و الأسم مش هيفرق بعد كده المهم المضمون, ولا ايه! 

انا فاهم ان الأحزاب دى لسه جديده و لسه معاندهاش خبره بس اكيد الاحزاب دى موجوده لسبب مش اسم و بس مش كده؟ و لو عايز تبيع ليه اسم ما تبيعليش مجرد اسم لا يعنى ليه اى شىء. بيع ليه اهداف واضحه و برنامج واضح

كل ال مالى الشوارع دلوقتى مجرد اسامى, و يا ريتها اسامى تشد

Friday, August 12, 2011

خدوا منك الثوره و سكت

كل يوم يخدوا من ثورتنا تت
بيضربونا بالجزم ولد و بت
اوعاك تزعقلى, انا مالى
ده خدوا منك التحرير, سكت

حمار محبوس و الحبس مش عاجبه
و الأكل بالتنقيط بس مش تاعبه
خايف من ال يسوقه, كرباجه بيلاعبه
خدوا منك اخواتك, سكت

بياكل التحوير مع البرسيم و يضحك
و يشرب الأشعات مع الميه و يضحك
و البحر مش عارف ليه يبصلنا و يضحك
مالك تنهق ليه؟ اكلوك الأونطه و برضو سكت

خدوا منك النت
سكت
خدوا منك الثوره
و برضوا سكت

Sunday, August 7, 2011

فين الأحزاب الجديده؟

فين الأحزاب الجديده؟
 
زاعلنين قوى ان الاخوان منظمين و بيوصلوا للشارع و ان السلفيين بيوصلوا للناس فى الجوامع؟ طيب انا لا انتمى لأى حزب و عايز اعرف عن الأحزاب و عايز اشوف التنوع بتاع الأحزاب فى الشارع
بس للأسف الأحزاب الجديده بشوفها بس فى التلفزيون
 
و لا فى الشارع و لا فى الجامعات و لا فى المساجد و لا الكنايس و لا الشوارع و لا اعلانات امال همه فين؟ ها تتعرفوا امتى و ازاى!
 
هننتخبكوا على اى اساس؟
ده حزب النور و البدايه مالين الشوارع, انتوا فين؟

Monday, August 1, 2011

احه يا ثوره

راجل لابس جلابيه خضره و عنده اكتر من ستين سنه قالى كده النهارده.

القصه بدأت النهارده و انا رايح احجز تذاكر القطر, و قفت فى طبور من اتنين و كانت الدنيا فاضيه. قربت ناحيه الشباك, لكن فى واحد بجلابيه كان عايز يقرب ناحيه الشباك من الجنب

قولتله: حاضرتك, فى طابور

قالى بكل عجرفه (و لاونى معرفش يعنى ايه عجرفه بس حاسيتها عجرفه): نعم

قولتله: انا بس بقولك ياريت تقف فى الطابور

قالى بصوت عالى جدا و بزعيق: و انت عايز ايه! بقولك ايه خليك انت فى الطابور و ملكش دعوه

قولتله: ماشى

بعد عن الشباك و قعد يتكلم بزعيق: ايه التناكه دى. ال طابور قال


بعدها وقف فى الشباك التانى و انا بدأت احجز التذاكر و سامعه بيكلم الراجل ال بيحجزلوا التذاكر

قال للراجل: ده حاجه غريبه اكمنه شايفنى بجلابيه بيتنك عليه.

بتاع التذاكررد: اهوه بعد الثوره بقى

قاله بكل لاوعى و ثقه ممزوجه بجهل و فخر بجهله: ثوره؟ مفيش ثوره. 

واخد التذاكر بتاعته و مشى عمال يقول بصوت عالى: احه يا ثوره

انا حسيت ان فى ناس نايمه و ساكته و ضد اى تغيير... و انا فكرت ساعتها فينا كمصريين. الواحد من دول لازم يعلى صوته و لازم يزوق و لازم يبين انه اصيع علشان كده يحب قوى  ان ال يحكمه يشكمه فى نفس الوقت و على رأى واحد من الناس الجهله المتخلفين سمعته فى نقاش حاد فى الميكروباص: احنا مبنجيش غير بضرب الجزم... لما واحد يبقى مقتنع بكده, تقنعه ازاى بالحريه و الديموقراطيه و حريه الرأى

ضحكت, الراجل رجعلى و كان مستعد للخناق و قالى بصوت عالى انت بتضحك عليا؟

رديت بكل برود و هدوء: لأ بضحك على مصر. ع ال بلد

مفهمنيش باين, مشى يزعق: الثوره هيه ال ضيعت البلد. احه يا ثوره

Saturday, July 9, 2011

ناس بتكافح و بتنام عال الأسفلت و ناس بتبلبط فى بحر اسكندريه

النهارده استغربت جدا للمنظر

ناس نازله البحر و سايبه بلدها و بتتمشا على شط اسكندريه بالعومات الملونه على اكتافهم و جرا وراها عيالها ال فرحانين بالشمس و البحر و الرمل و بيجروا فى الرمل باللبسه و المايوهات, يا فرحت اهلكوا بيكوا

و ناس نايمه بقالها ايام على الرصيف و واقفه طول النهار فى الشمس لما دماغهم ورمت و امهات ولادها مقتوله و اخوات اخوتهم مضروبه بالنار و شباب دمها محروق

دول بيبلبطوا فى الميه و بيعملوا جبال من الرمله

و دول بيضربوا عن الطعام و معتصمين علشان محدش مصرى يتهان و لا يتقتل ظلم

دول بيحبوا الشمس و الرمل و الطبيخ على الشط

و دول بيحبوا الحريه و نفسهم البلد يبقى فى قانون و امان

انا احترت فى الناس. ناس بتضحى بحياتها علشان نعيش محترميين و لينا كرامه و انسانيه و ناس مش بس عاملين زى الفراخ مطرح مالبلد تحطلهم اكل يكلوا و مطرح ما يتقلهم ناموا يناموا لأ ده بيهاجموهم و يتريقوا عليهم

غريب اوى... انا مصدوم و مش فاهم

Thursday, July 7, 2011

جيل التنابله

واضح ان ال جيل ال خلاص فاض بيه لازم يبطل يسمع لتنبيهات و هلع و رعشه و احلام و هلاوس جيل التنابله.

جيل التنابله ده اصله دينه التلفزيون و سنته الجرايد. و ال يحكمه يسقفله و يدعيله. تنبل. الجيل ال عمل الثوره فى مصر يوم 25 و يوم 28 اول جيل فى تاريخ مصر يرفض حاكمه و يثور عليه و يشيل حاكمه, و اسأل و اقرا فى تاريخ مصر. هما (جيل التنابله) كانوا و مازالوا مقتنعين ان الحاكم ده زى الحاكم بأمر الله كده, كتير منهم عقل, والباقى عيان بأمراض جيله, الكرش و الرشوه و الجبن و الخوف و المشى جنب الحيط و التفريط فى حقوقهم و الروتين و همه ولاد تعيين القوه العامله. عشان كده بيحسوا ان البلد عملت معاهم واجب و عينتهم, طب احنا اهو و لا اتعينا ولا نيله. همه كتير من اباهتنا. عارفين ايه كلماتهم المشهوره! ابعد عن المشاكل, اوعى تدخل قسم بوليس. المظاهرات وقفت حال البلد. وقت المظاهرات هتلاقيهم بيتفرجوا و واقفين فى البلكونات, همه ال نسيوا شهامه ابهاتهم و جدعنه ولاد البلد و مساعده ال يحتاج و علموهلنا, شكرا.

تبقى محظوظ لو اهلك من اليساريين او الشيوعيين لأنك هتشوف تحول كبير فى شخصيتهم. ببساطه سيبوا الشباب الحر ال قاوم افكاركوا المتنبله طول حياتوا يحرر البلد و ينضفها من الزباله ال غطيطها. لو مش عاجباكوا الثوره ما تهاجموهاش متحبطوناش, متتعاملوش معانا على اننا بنعمل المستحيل, اهوه وريناكوا ال عمركوا ما شوفتوا

اصبروا علينا, و الهى هنخلى الحياه احسن. اصبروا علينا. و هو اديكوا جربتوا نظام السرقه و السجن جربوا غيروا شويه... مش مصريين انتوا برضه؟

Saturday, June 25, 2011

انا لا اخجل و لو بتخجل, ايه يعنى, متخجل

ابدع زى ما انتا عايز و لكن الحريه تتوقف عند انه يدرس او لا يدرس

بكده انهى الأخ الصحفى الخجول حواره على قناه أون تى فى 

الأخ الصحفى شايف ان لازم نمنع تدريس قصه قصيره من منهج اداب قسم اللغه الأنجيزيه علشان فيها مشهد جنسى (خلينى افكركوا انها قصه قصيره, يعنى مش صور ولا فيلم اباحى) فى الوقت ال فيلم زى عماره يعقوبيان اتعرض و كان من اقوى الأفلام فى السينمات

بغض ال نظر عن تدخل شخص لا يمتلك ولا الخبره و لا ال درايه الكافيه انه ينقد عمل ادبى من الأدب الأنجليزى قال الصحفى ان كتير من البنات بيتكسفوا من المناهج, طيب ايه ال مقعدهم فى الكليه؟ ما يحولوا؟ قسم مكتبات جميل و مفيهوش حاجه عيب او مثلا اجتماع او تاريخ بس لو تاريخ يا ريت ما يدرسوش التاريخ اليونانى او الرومانى عشان ما "يخجلوش". 

هوه لو طالبه فى كليه طب بتكسف منكن تطلب من العميد عدم اظهار العضو الذكرى او رؤيه جثث؟؟ علشان هيه بتخجل؟ 

طيب ينفع واحد مبيفهمش فى الطب يتدخل فى الملوش فيه و يقول للدكاتره ما تدرسوش الحجات دى علشان بنتى بتخجل؟ 

طيب ما لو اداب قسم انجليزى فيها حجات انت بتختلف معاها ما تسيبها. هوه ليه كل واحد بقى يتدخل فى ال ملهوش فيه و يقول انا مش عايز طلبه اداب قسم اللغه الانجليزيه يدرسوا ده او عايزهم يدرسوا ده, عفوا هوه حضرتك مين علشان تقرر؟؟؟

احب انهى المقال ال كتبته و انا دمى محروق بكلام الأخ الصحفى قى تعريف الأبداع

وجهه النظر تتوقف عند اخلاقى و عند دينى...

و احب ارد, مع كامل احترامى ليك انت حر من حقك ان القصه ما تعجبكش او ان اى حاجه ما تعجبكش بس مش من حقك انك تمنع اى حاجه تختلف معاها, لأن بعيد عنك فيه حاجه اسمها حريه الأبداع و حريه تدريس الأبداع فى مدرسه الأبداع ال هيه كليه الاداب قسم الأدب الأنجليزى

زى ما بندرس الموسيقى فى معهد الموسيقى و الرسم فى كليه الفنون (هل لما يرسموا امرأه عاريه او رجل عارى علشان عيب بالنسبالك نمنعهم؟)

من فضلك لا ترجعنا للعصور الوسطى

الله يرحم محمد على باشا, كان زامنه مات مشلول لو شاف الفيديو ده

Monday, June 20, 2011

المواطن الخفى

هو مواطن غير موجود فعليا

مواطن بيركب جنبك فى الموصلات و قليل اوى لما تلاقيه بيتكلم فى اى موضوع

لما يبقى فى خناقه فى الشارع, يفتح المواطن الخفى الشيش و يتفرج بدون صوت علشان محدش يشوفه... بس ماهو حتى لو حد شافه ايه ال هيحصل مش هيشفوه, ما هو خفى

حتى لما بيزعق و يتنرفز اما يفيض بيه محدش بيسمعه و لو سمعوه بيبقى صوت بس مفيش صوره

مواطن ماشى جنب الحيط و بيقول يا حيطه دارينى

دايما خايف, من كل حاجه... من الحياه من السياسه من الموت من الحب من الضياع من قلت الفلوس من الفشل

فى منهم نزل التحرير بس كان مستقوى بالزحمه و منهم فضل انه يبقى خفى و يكمل خفى

محدش يعرف اسمه, و هيعرفوه اسمه ازاى اذا كان هوه مش موجود

بيحاول يتكيف مع ال حوليه و مقتنع انه ميقدرش يغير مفيش فى ايده حاجه يعملها

لو واحده اتضربت قدامه و اغتصبوها هيقولك و انا هعمل ايه! هيضربونى... و يفضل خفى

وجوده زى عدمه

و يعيش و يموت مواطن خفى لم يضيف اى شىء و لم يؤثر فى حد

دليل الحاكم الماهر للقضاء على الثوره

بعد خطاب بشار الأسد و محاولته تقليد النموذج المصرى للقضاء على الثوره حسيت ان نفس السيناريو بيتكرر. بعد نجاح (هندله - handling) الثوره فى مصر قرر بشار تقليدنا. ده دليل ل أى حاكم يبقى فى بلده ثوره. دليل سهل و بسيط و اثبت كفائته


دليل الحاكم الماهر للقضاء على الثوره



- بعد الثوره مباشره ابدأ فى التهديد. استخدم المصطلحات الأتيه (يد من حديد) و (لن نتهاون) و (نحذر)

 - لو لقيت نفسك بتخسر (جيب وراه). و قول زى بشار كده (الدوله كال أم او الأب) أو (لن اموت الا على تراب بلدى) و كرر اسم البلد كتير

- فورا ابدأ فى التخوين استعمل (كنتاكى) او (اطماع خارجيه)

- شتت الناس. اسأل اسأله تحسس الناس انهم م اشتركوش فى الثوره زى القذافى (من انتم!) (وين كنتم!) او فرق بينهم و قول كلمات زى (قله مندسه) (ايادى خفيه) و اسأل على المواطن الفقير ال هيتضر بسبب الثوره (المواطن الفقير ال عمر ما حد بسأل عنه

- اعرض الحل بشكل اسأله تفرق بين الناس زى مثلا
انا انوى الأصلاح و موافق على ارأكم بس ايه رأيكوا دستور جديد و لا نصلح فى الدستور القديم؟
طيب بتحبوا الريس ده و لا ده؟
نعمل سلام مع البلد الفلانى ولا نحارب؟ 
الناس هتحتار و تبدأ فى الأختلاف و يتشتت انتباههم عن اسباب ثورتهم و تبدأ الخلافات و التقسيمات

- قول كلام محدش يفهمه بس يفزع زى (انهيار اقتصادى) (ميزانيه الدوله) (الفوضى الخلاقه) (اعمال الترهيب)

- دايما ابدأ كلامك بتمجيد للثوار. حسيسهم انهم جامديين اوى و انهم نجحوا و عملوا كل حاجه (طبعا انته بتاكل بعقلهم حلاوه بس هوه ده احسن حل للتعامل مع الثوار الزنانين)

- حط حلول بس خليها بعد مده يعنى (لم اكن انتوى) و ادونى ست شهور او ادوا لوضع الدستور تلات شهور. و حط حاجات من مطالب الناس الأساسيه بعد المده الطويله دى, ده هيديك فرصه انك تلم الناس ال مضايقاك و تظبط التظبيط و حيلينى بقى لما تنفذ حاجه

- المماطله - دى كلمه السر. لازم تستغلها صح. يعنى لو قولتلك هات الفلوس ال عليك قولى انهى فلوس؟ هوه انا خدتها امتى؟ طب اثبت؟ يوم الحد و لا السبت؟ انته بتسألنى ليه؟ ليه معملتش محضر؟ و ده كان الساعه كام؟ و افضل سفسط و لوك لوك لما ازهق و اقولك يخلى يلعن ديك دى فلوس مش عايز حاجه


دى كلها حاجات مجربه و اثبتت فاعليتها. امشى عليها و هتدحك على اى شعب. و ادعيلى

امضاء فاعل خير

Sunday, June 19, 2011

بيقولوا

بيقولوا

سمعنا عن ثوره كبيره قامت فى مصر
بيقولوا كان
فى ظلم طاغى
وكده خلاص فلوسنا رجعت
ال سرقوها زمان
بس الحقيقه فلوسنا دى ما شوفنهاش
يمكن عشان
احنا مش عايشين فى مصر

فى بيوتنا فى
تلفزيونات
باسلاك طويله
ممدودات مالبلكونات
وفيها ناس بتقول ضميرنا خلاص صحى من السبات
و لما بمشى فى الشوارع بتشتم و باتضرب
يمكن عشان
ضميرنا مات

جيرانى ناس
على اد حالهم
و احنا ناس على اد حالنا
بنشتغل علشان نعيش
ناكل نعيش
و ننام نعيش, ما بنشتكيش
ليه نتظلم؟
يمكن عشان
ما بنشتكيش


عايشين فى شارع
فيه شباب
عايشين حايتهم عال القهاوى
و جريهم وراه البنات
و لما تسأل حد فيهم ايه شغلتك؟
يشرب فى شايوه و يبتسم و ما يجاوبش
يمكن علشان
القطر فات؟

بيقولوا فى
ناس زعلنين من الحياه
علشان قست
ع الخلق و الأيام خلاص ما بقتش ترحم,
ال جيبه فلوسه راحت
حتى ال جيبه فيه فلوس
 الحياه بتمد ايدها و ما بتسيبوش
يمكن عشان
الحياه ما تعرفوش 


كتبها

احمد مجدى


© Ahmad Magdy - 2011