Friday, October 15, 2010

أعمى

زمان كانت اكتر حاجه مش موتوقعه و بتنرفز ان الواحد يبقى صاحى سعيد و يبص فى المرايه و فجأه يلاقى "حبايه" طالعاله فى حته فى وشه مثلا و فجأه تلاقى كل الخطط و الأفكار ال كنت ناوى تعملها بخ, انتهت. فجأه. بدون مقدمات. انا بسمى ده القدر او المستقبل ال هوه مش متوقع. بحس ان اى حاجه منكن تحصل فى اى وقت. طب انا كده بحس انى اعمى و بحسس علشان اشوف طريق انا ماشى فيه و مش عارف نهايته. المشكله ان فى وسط الطريق منكن حد يعمل نفسه بيساعدنى و يمشى معايه شويه و فجأه يروح مثلا ضاربنى على قفايه و يضحك بصوت عالى ما أنسهوش طول عمرى و يقول "دحكت عليك يا أهبل انا و لا صاحب ولا  نيله انا كنت بتسلى. انا كمان مابشوفش يا عبيط" (زى فيلم الكيت كات كده) و يجرى حتى مايسمعش هقوله أيه. بس انا اعمى, مقدرش اجرى وراه ولا أعمل آى حاجه. المصيبه انى بحس ان طول الوقت خلاص حفظت السكه, لكن فى لحظه عربيه منكن تنهى الحياه فى ثانيه. فى اقل من ثانيه كمان.
و السايق مش حيحس بحاجه, اكنه لبس مطب, ماهو اصله هوه كمان اعمى.

طب هل اصدق اى حد يقولى انا هاساعدك؟ او يتكلم معايه و انا مش شايفه؟ لأ انا بحاول ابقى جاهز لأى مفاجأه بس للأسف مش بحس انى اقدر اتكيف على الموضوع ده. سعات المفاجأه بتكسر الأراده ال بتخلى الأعمى يحسس و يكمل الطريق...

Thursday, October 14, 2010

الجواز جنينه الحيونات, وجهه نظر شخصيه

الجواز ده يحير. زى بظبط اما الواحد و الواحده يبقوا اتحبسوا فى قفص فى جنينه الحيونات. هوه أه قفص بس بالنسبه للراجل ليه مزايه و ليه عيوب. يعنى مثلا العيوب

مفيش سرمحه و شله يصيع معاهم. 

مينفعش يسيب الشغل و يتخانق مع المدير, عليه ديون

مفيش مفر


مفيش صحوبيه و روس و شرم

و كل الجمل ال بتبدأ ب "مفيش"

المزايه هيه بظبط مزايه انك تبقى حيوان فى جنينه الحيوانات

أكل صحى و فى معاده

شرب و رعايه صحيه لو حصل حاجه للواحد

و مرافق بقه. زى شقه نضيفه و مكان مريح و سعات ايام حلوه 

ف هيه حسبه عيوبها زى مزاياها للراجل... بس لسه اسمها جنينه حيوانات و اسموه قفص

Wednesday, October 13, 2010

انا مالى؟ ها يفرق معاك

انا مالى؟ بجد السؤال ده سهل أوى. صحيح انا مالى! هيفرق معاك\ى؟ لأ حقيقى هيفرق؟ كل واحد عنده مشاكله و الدنيا مش سايبه حد فى حاله, ف لو انا قلت انا مالى هايفرق؟ طب ايه ال هيحصل لو قلت انا مالى هتحل\ى مشاكلى؟ يا ريت حد يعرف

طب حاضر. انا ارفان. بفكر كتير فى كل حاجه (كل حاجه) معيش الفلوس ال نفسى فيها, مش فرحان. مخنوق من البلد و الناس. شفت نداله بعمرى. شفت لا مبالاه. شايف ناس متبرمجه ماشه فى الشارع بتعمل نفس الحاجه كل يوم ما عاده ايام الأجازه (ايام الأجازه بيعملوا فيها ال بيعملوه كل اجازه) مبيزهقوش, انا كمان اتبرمجت. مفيش تجديد. محدش فاهمنى غير ناس معينه و الناس دى انا مش فاهمها. مش قادر اقبل اى حقيقه من غير ما افكر فيها و الناس و الصحاب و المجتمع بيقولى لا تناقش و لا تجادل يابوحميد. مهموم. مش شايف هدف واحد. ارفان من الشغل.

ها؟ ايه؟ فرق معاك\ى؟ طب ما انت\ى سعات بتحس بكده, هل ده اثر فى حياتى؟ هل ده اثر فى حياتك؟ هل ده اثر فى حيات اى حد؟

انت شايف ان ده مؤثر. بجد شايف كده؟ يا بختك

Tuesday, October 12, 2010

المجانين

المجانين دول عجيبين قوى. المجانين الماشين فى الشوارع ال ملهمش دعوه بحد دول. هتلقيهم لبسيين نفس الهدوم ال بقى لونها اسود مخضر كده زى ماتكون عفنت عليهم. بيمشوا كل واحد لواحده. شعرهم اسود كده غامق و مطين. بشوفهم نايمين فى الشوارع و مش بشوفهم بياكلوا لكن سعات بيبقه فى اديهم سجاير (يا ترى بيجبوها منين و ازاى!). عمرى ما شفت حد منهم بيكلم حد و عمرى ما شفت اتنين منهم مع بعض. بشوفهم كتير بيكلموا نفسهم. و فى منهم عامليين لنفسهم بيوت صغيره, كومه. عارف فيين! فى رمسيس قدام ال سى اى بى على فتحت التهويه بتاعت المترو و كمان فى اسكندريه شفت واحد فى سيدى جابر عند الترام و اماكن كتير.

يا ترى بيفكرو فى ايه! و همه هنا ليه! ليه فى الشارع! فى حد قالى دول خرجوهم من العباسيه علشان العدد زاد. انا بخاف منهم, اوى. بس يا ترى همه بيخافوا منينا بردوا؟ ولا مخهم فيه ايه 


معرفش  

Monday, October 11, 2010

فلسفه سواق الميكروباص

الناس زعقت فى السواق يعم اطلع الكوبرى متأخرناش كفايه انك ماشى عمال تحمل فى زباين و اخرتنا. 

السواق رد عليه رد قمه فى المنطقيه بالنسبالى قال لل أتكلم انت شغال ايه؟

قاله ملكش فيه

قاله السواق ماشى يا باشا و انا دى شغلتى ال باكل منها عيش فسيبنى اشوف شغلى

رد واحد تانى يا عم انا هديك الخمسه و سبعيين بتاعت الزبون ال هاتركبوه

قاله يا فندى خلى فلوسك فى جيبك و لو مش عاجبك و فلوسك كتير انزل خد تاكسى

قاله مالكش دعوه بفلوسى ده انا اشتريك

رد السواق ربنا يزيدك

واحد تانى قال مش كفايه الوقفه الزفت دى

رد و انا مضربتكش على ايدك علشان تركب.

و بعدين قال على رأى المثل عريان الط@$ و بيتأمز تأميز و يقول باب الخماره منين

انا حسيت الراجل ده فليسوف, على اد تعليمه, بس كلامه منطقى  

Sunday, October 10, 2010

كفايه بقى. اوعى تسترجل

خليك راجل. كلام رجاله. ده عيل مش راجل. وقفت رجاله. استرجل

لما بفكر فيها بلاقى ان كل الكلام الكويس القوى لازم يبقى فيه كلمه راجل

نسوان. كلام نسوان. مايع. شغل بنات. بناتى. حريم

و اى كلمه مش جدعه و ضعيفه و مكسوره لازم يبقى فيها بنت او ست

نفسى افهم ليه؟ ما فى كلام بنات ارجل من ميت كلام رجاله. و فى بنات بتقف وقفه ارجل من و قفت ميت راجل. انا اعرف بنات بتفكر احسن من رجاله قاعده على القهوه حياتها طاوله و شيشه و كلامها عن البلاى ستيشن. مش معنى كده ان البنات مفيهاش بنات حايتها ميك اب و شوبنج و كافيهات. لأ فى. بس مش هاقول البنات كده, ده هبل. انا نفسى افهم ليه فى بنات مقتنعه ان اى راجل او ولد مهما كان منكن يكون احسن او اذكى منها او حتى اقوى منها (مش بتكلم بالعضلات. الدنيا اتطورت مابقتش القوه بالعضلات دلوقتى ال "سلف دفنس" منكن يقعد اكبرها راجل).

بلاش نفضل مخنا مقفول كده. لو على الهزار هزر بيس لكن فكر\ى فيها ليه مفيش ستات كتير مشهوره فى التاريخ؟ ليه مفيش ستات فى مجالات كتيره ظاهره؟ انا اقولك. علشان الرجاله بأنانيتهم كانوا حبسينهم, مقيدنهم, محسيسنهم انهم اقل منهم و لسه كده.

لأ مش هسترجل و لا اتكلم كلام رجاله. انا هبقى بنى ادم و هاحترم كل البنى ادميين.