Thursday, September 23, 2010

لأ واضح انه مش حرام

اى لمه فى الشارع معناها خناقه او حادثه. و فى الحالتيين بحس انى هموت و ابص انشلله لو بصه واحده, اشوف بس ايه ال حصل. و بلاحظ ان مش انا لواحدى ال ببص ده كله بيبص. 

شفت لسه منظر غريب اوى. واحد مخبوط من عربيه و سايح فى دمه و حواليه لمه كبيره من الناس واقفين بيبصوا عليه و هوه فى اخر انفاسه. واللهى بيبصوا بس و الراجل بيموت و ناس ركنت عربيتها مخصوص علشان تتفرج. و فى ال بص بصه و سأل فى ايه و مشى. بجد مصدقتش, طب حد يساعد طب بلاش ابعدوا عنه. مش عارف. اول ما العربيه ال انا فيها اتحركت الراجل ال سايق و ال جنبه بدئوا مراحل التفسير. ده اكيد كان بيعدى الشارع. و بدأت كلمات تترمى كده

ده غلط

الأنسان ملوش ايمه

فين الأسعاف

مش حرام

صحيح والهى مش حرام! سعات بفكر مش حرام 

Wednesday, September 22, 2010

البنات و الولاد . قصدى الرجاله - وجهة نظر - ايام اما كان عندى نظر

البنت فى مصر عجيبه لأ بجد عجيبه. يا إمه مكسوفه مكبوته مش مستعده انها تتعامل مع اى حد لحد ما تتجوز. عرفت منين! الرغبات ال جواها بينا فى عنيها و هيا بتبص لواحده لبسه ال هيه عوزاه و تنزل وقت ماتحب و تهزر مع اى حد مش مقفله. مش معنى كده انها بتحسدها. لأ كل الناس مختلفه بس بشوف فى عنيها رغبات و امانى و حجات مقفول عليها, بارادتها او مش بارادتها, معرفش.

وسعات بتبقى حابه كده و مش مستعده انها تتغير, براحتها طبعا

يا إمه بقى برضو ملتزمه فى لبسها لكن خلاص كسرت حاجه جواها كانت مسكاها ف بتتعامل عادى مع ولاد و بنات بكل الأشكال و بتعمل ال هيه عاوزاه و بتستحمل العواقب, و بكل عند بتعمل الممنوع

و فى ال مش ملتزمه بتعاليم اى دين فى لبسها بس ملتزمه بقيود مجتمع شرقى (و شرقى يعنى ماتعملش اى حاجه قدام الناس و اعمل كل حاجه فى اماكن مقفوله) بس لسه مقفله كل الأبواب مع الولاد و مخوناهم كلهم (و بصراحه ف حجات عندها حق

و فى ال عايشه حياتها اخر حاجه.

قليل اوى لما تلاقى حد وسط بس فى ناس وسط, 

الولاد قصه تانيه

يا ولاد تعبانه و بتشمشم على بنات تظبطها, يا مالوش فى البنات و اول بنت يصاحبها تبقى مراته

و فى الشباب التنك ال عايش على البنات و ده للأسف سعات كتير البنات تتشدله و ده بيخليه يزيد تناكه - احفظنا يا رب

و فى الشاب ال يعمل اى حاجه علشان الواحده تبصصله و ده بتلاقيه دايما عايش حوارات

انا سعات بفكر

انا بنتمى لأى نوع من دول و الناس ال اعرفها من انهى نوع

يا خوفى

Monday, September 20, 2010

صور

قعدت اقلب فى الصور بتاعتى ال معمولى فيها تاج على الفيس بوك. اول مره اعملها من ساعت ما عملت اكونت. لأول مره احس ان حياتى مجرد صور و المستقبل شويه صور كمان هضيفهم للألبوم. مفيش حاجه اقدر احافظ عليها علطول كله بيخلص و يتلخص فى صوره. مجرد صوره

صور ليه فى الشغل لابس فورمال. صور ليه فى الهرم مع اصحابى. صور الكليه. صور اصحاب الكليه. ال اتجوزت و ال سافرت و المعرفش عنه حاجه و ال لسه بشوفه و اصحاب. صور مع اهلى. مفيش صور للمدرسه ليه معرفش و صور و انا طفل و بيتعملى عيد ميلاد. ياه 

حياه كامله عباره عن مجموعت صور. يا تارى كنت حالتى ايه فى الصور دى. 

يا ترى الصور ال جايه ها تبقى عامله ازاى و لا هتفضل دى بس الصور الحلوه