Wednesday, December 29, 2010

زى الحيوان

فكرت لو اتخليت عن تلات حاجات ضروريه فى حياتى بتشارك فيهم مع الحيوان ايه منكن يحصل!

الأكل
الشرب
النوم

لو اتخليت عنهم هلاقى فى وقتى كميه وقت فاضى غير معقوله. بس مقدرش ابطل اى حاجه من دول لو اتخليت عنهم هموت. زى اى حيوان

Monday, December 27, 2010

سكه تانيه

فى ناس كتير اوى دلوقتى فى مصر مش بتعمل اي حاجه فى حياتها. الولاد منهم بيبقوا مرميين فى الشوارع و على القهاوى. اكتر حاجه بيفكروا فيها هيه الكرامه و الهيبه و ازاى يثبتوا انهم اقوى او اصيع بشرب الخمره و مسك السلاح. و كمان بيفكروا ازاى يصتادوا بنات, ال هوه اكنهم بيصتادوا غزلان. و فى منهم بيفكرا ازاى يجيبوا فلوس علشان يحققوا ال قولته فى الأول ال هوه يشتروا كيف و خمره و يعزموا البنات بره. 

انا مين علشان احكم على حياة حد و اقول ان ده صح او غلط

بس الناس دى لازم تبقى كده و إلا ها تتاكل. بس هوه يا تاكل يا تتاكل. طيب و ال ملوش فى الغابه يعيش ازاى؟ و ال ملوش فى الصياعه يعيش إزاى؟ 

طيب هيه الناس دى ايه هوايتها؟ فى منهم بيغنى, ليه ما بنسمعهمش؟ فى منهم بيرسم ليه ما بنقدرهمش؟ و فى منهم بيسوق عربيات ليه ما بنساعدهمش؟ 

بس الناس دى لازم تبقى كده و إلا ها تتاكل. بس هوه يا تاكل يا تتاكل. طيب و ال ملوش فى الغابه يعيش ازاى؟ و ال ملوش فى الصياعه يعيش إزاى؟ 
  


Friday, December 24, 2010

سعات بتكلم بسكوتى

سعات بتكلم بسكوتى. بشرح كل ال نفسى اشرحه و بضمن ان ال بيسمعنى مش هيفهم سكوتى. اصل سعات السكوت يبقى احسن من الكلام فى مواقف

لما الاقى اقرب حد مستنى منى تفسير ليه مش بسأل عليه, بسكت

لما الاقى ال بحبه و بعزو بيسألنى هوه انا بحبه ولا لأ, بسكت

لما الاقى ال بكرهوه بيسألنى انا ليه بكرهوه, بسكت

بسكت كتير, لكن ال يفهم كلامى اكيد اكيد ها يفهم سكوتى 

Thursday, December 23, 2010

احنا عرب

مهما اختلفوا فى اشكالهم و فى طريقتهم و فى لبسهم و فى تفكيرهم

لكن لما بيتكلموا بلغه واحده و هيه اللغه العربيه الفصحى كلهم بيفهموا بعض

مش كلهم بيحبوا بعض و لا كلهم بيكرهوا بعض 

لكن كلهم بيكرهوا عدو واحد منكن يتعملوا معاه بس محدش بيحبه

كلهم دمهم حامى. دمهم خفيف.

ده ال أكتشفتوا فى اول لقاء ليه مع عرب من دول تانيه غير مصر

صحيح اول مره افهم ليه كلمه عرب بتجمع شعوب كتير مختلفه.

و ال اتعلمته انى اخر مره احكم على حد من غير ما اتعامل معاه

احنا عرب    

Wednesday, December 22, 2010

الضحك فى الوش

بستغرب البيضحكوا فى وشك و همه مش بيحبوك. بيبقى شكل الضحكه و اضح اوى بتبقى محدش يصدقها او بمعنى اصح انا مش بصدقها. 

انا من فتره واحد مكنتش بطيقه لقيته بيسلم عليه و الضحكه مرسومه على وشه زى ميكون لازقها مخصوص. يمككن تكون ظروف شغله بتخليه حبوب مع الناس بس بالنسبالى انا. ده نفاق انا مبحبوش

اصل ايه هيحصل لو حد مضايق من حد يا يقوله يا يبعد عنه لكن النفاق الأجتماعى ده من الحجات ال بكرها. بتبقى اكنك ملتزم لكن بتشرب خمره فى الحفلات بس


Thursday, December 9, 2010

البيعه

بكل بساطه التلفزيون بيعرض البنت و الست على انها زى اى حاجه منكن تشتريها. يعنى لما واحد يتغنى يبقى اوتوماتك معاه عربيه و فيلا و موزه. بظبط كأن الواحد منكن يجييب البنات دى من كارفور بس لما فكرت فيها لقيتها صح. 

خلاص الطموحات اتغيرت البنات كتير منها عارضه نفسها للبيع لليدفع اكتر. كتير من الولاد معهومش فلوس كفايه انهم يدخلوا المزاد. الفكره انك سعات تسمع عروض, على اساس انك بتشترى تلفزيون LCD ال هوه, العروسه اهلها بيشتروا راجل فا هيعملولك تخفيض و ينزلولك فى السعر.


هوه ليه ال بيتجوز بيطلب البنت من اهلها و يدفع فلوس؟ مليش دعوه بالمسميات انا معنديش مشكله مع التقاليد انا بس بتسائل. هيه فين البنت من كل ده؟ اما هيه تبقى حياتها عباره عن تسليم و تسلم القياده من حكم باباها لحكم جوزها. كأن واحد اشترى عربيه و بيبعها


و بيدى معاها ضمان و منكن تطلق لو البضاعه المباعه معجبتكش


الموضوع بقى بيعه



Monday, December 6, 2010

النهايه

لكن النهايه لما ظهرت فى الشريط
كانت المفاجأه ان اتكتب على طرفها كلمه عبيط

و اوعى تسأل او تفكر ايه الحكايه
دايما كده قبل البدايه نقوم ندور عال نهايه

النهايه مش كلمه بحروف عريضه
النهايه حروف و كل حرف ليه خريطه

فين الحقيقه؟ فين الروايه؟
او حتى قولى يبقى ايه اصل الحكايه

الحكايه كلمه واحده تختصرها
كلمه واحده تموتك, و تجيب اخرها

الدنيا صبحت مسخره
دونيتى بدأت من وراه

صحيح ها تخدوا منها ايه؟
و العيون كلها سرقه و غل ليه؟

الحياه زى الكتاب, اصل الكتاب مبقاش له قيمه
لمه بتبعد عالنصوص, هتاخد بالجذمه القديمه

Sunday, December 5, 2010

البحيره - الجزء التاسع و الأخير

قمه الذل الحيوانات بقت بين ناريين. البحيره فيها تماسيح خداميين الدب الكبير الملك و مابيسبوش حد يشرب و على الناحيه التانيه الحيونات ال بتاكل الحمه اتوحدت (غصب عنها) تحت الدب.

بس الأيام لفت. زى الأعصار الأحوال اتقلبت.

الحر نشف البحيره. الوضع اتقلب.

الشمس الكانت زمان بتمثل الأمل استخبت ورا سحاب تقيل اوى, مليان دموع...

الهجوم من كتر عنفه عمل زلزال فى الغابه كلها بس ميين يقدر يوقف الزلزال. الضباع اول حيوانات هاجمت  و بعدها الأسود و بعدها الدببه. التماسيح هاجمت الدب الملك و ال بيحموه

كانت مجزره

الضباب بعد مغاب على البحيره اليوم ال بعد الحرب دى مبانش اى حيوان غير هياكل عظميه للماتوا فى الهجوم

رجعت الغابه زى ما كانت. الحيوانات زى ما كانت. كل حاجه رجعت.

البحيره حتى بعد اما اتملت بعد شهور محدش ابدا فكر انه يتجمع تانى. و فضلت القصه تتعاد و تتعاد لأجيال عاشت فى الغابه...

Saturday, December 4, 2010

البحيره - الجزء التامن


لما التماسيح راحت للدب الكبير و قالت انها مش هتشتغل الشغلانه دى خلاص و هيه بتعملها من غير مقابل اصلا. الدب الكبير رد بكل برود و قال

لأ انتوا بتشتغلوا بمقابل. لو مشتغلتوش البيض الف و لادكوا عمروا ما هايفقس. علشان انا خليت الدببه يلموا كله و يخبوا عندى. اختاروا يا تماسيح.

التماسيح اتصدمت أزاى حد همه خدموه يهددهم بالشكل ده. ده غلط. بس همه كانت عقليتهم قديمه شويه ميعرفوش الغابه بقت ماشيه أزاى

فى منهم اتنرفز و اتخانق بس على الفاضى. فى الأخركل التماسيح بقوا خدامين الدب الكبير.

دلوقتى الوضع اتغير حوليين البحيره. بقى فى كل الحيوانات المش بتاكل اللحمه حولين البحيره. و البتاكل اللحمه بقو تحت أمر الدب – الجوع خلاهم يوافقوا انه يبقى ملك عليهم و سموه (الدب الكبير الملك). و التماسيح بتخدم

بكره الجزء التاسع

Friday, December 3, 2010

البحيره - الجزء السابع

الخناقات زادت عل ناحيتين. ال مش بيكلوا اللحمه طول الوقت الخوف خلاهم بيضربوا فى بعض على اقل حاجه. و فضل كتير منهم مستنيين الموت.

الحيوانات البتاكل اللحمه قررت انها تهجم اخر هجمه على الرغم انهم مش منظميين بس فهاجموا بس كتير منهم اتصاب و طلعوا من الهجمه بحمار وحشى و برضوا اتخانقوا عليه.

الدب الكبير على العكس كان مستريح و مريح الحيونات المعاه اخر حاجه و التماسيح محستش ان همه بيستغلوها  لحد ما حسوا بالأهانه من باقى الحيونات ال سموهم "خداميين الدب الكبير". هنا بقى قراروا انهم يوقفوا خدمه و يطلعوا من الأزمه الهمه دخلوا فيها

بس اكتشفوا انهم فى مشكله ملهاش حل و التماسيح حست ان مفيش حل هيفضلوا يخدموا. الدب كان مجهز نفسه

بكره الجزء التامن

Thursday, December 2, 2010

البحيره - الجزء السادس

الكل اتوتر و الخرفان بدأت تفقد اعصبها و كل واحد يقترح حاجه و كله بيحاول يعلى صوته علشان يبقى اعلى. دوشه عل فاضى معملتش اى حاجه غير انها وترت الكل.

الدب الكبير كل و اكل الكل معاه من الأتبعوه بس الباقى بقه ضعف من الجوع فبصوه بجوع للغنيمه و محدش عمل حاجه. فى تعالب كتير ضعفت و دخلت تحت جناح الدب الكبير.

بس الحيوانات البتاكل اللحمه استفادت برضو لأن كتير حاولوا الهرب من الحصار ده بشكل هوجائى ف دول اتاكلوا و مفضلش منهم حاجه.

بس الخناقات زادت بين الحيوانات على الطرفيين. دول بيتخانقوا مع الخرفان علشان "الفكره بتاعتهم ضيعت الكل" و الناحيه التانيه بيتخنقوا على الأكل الأصتدوا من الحيونات الهربانه. 

بكره الجزء السابع

Wednesday, December 1, 2010

البحيره - الجزء الخامس

كان دخول التماسيح للتحالف نقطه قوه مينفعش حد ينكرها. قوته فى المهاجمه من الميه كانت مفاجأه للكل و محدش يقدر ينكرها كل الحيونات اتفاجأت. الزواحف دى العاشت الاف السنين و يمكن ملايين صعب اوى يلاقولها حل.

التماسيح كانت هاديه و رزينه وافقت علشان صعبوا عليها مقابل ان مفيش اى حيوان هيتقدملهم اكل بعد الأزمه دى متخلص. ايوه بيشتروا سمك فى ميه لكن محدش فهم ايه الفكره. بس التماسيح كانوا هاديين قوى و صعب يتعرف بيفكروا فى ايه.

الفكره كانت قاضيه و نجحت بشكل غريب. الحيونات ال مش بتاكل اللحمه (مأقدرش حيوانات أليفه علشان محدش يعرف ال فى النفوس) النفوس ابتدت تضعف لما لقوا ان التماسيح بتسحبهم واحد واحد جوه الميه. بكل سهوله بتسحب الحيوان و تلفه كام مره و تغرقه. كان الدب اوامره واضحه, انهم يركزوا على الأطفال و الأناث علشان يضعفوا عزيمه الحيونات. و ده الحصل.    

بكره الجزء السادس

Tuesday, November 30, 2010

البحيره - الجزء الرابع

التماسيح يا حيوانات.

الكل مصدقش اد ايه الفكره مذهله. الدب كمل

التماسيح هيه الهتجيب الأكل لحد منلاقى حل للهمج دول. انا كلمتهم و اتفقت معاهم. ايه رأيكوا؟

الكل انتبه و لف حوليه. الكل وافق

على شرط انا هحكم. مش انتوا بس ده انا هحكم الكل. بعد منفك الزحمه ال همه عملينها دى. انا هحكم الكل.

الدببه كنوا عرفينه و عرفيين اد ايه هوه يقدر يأذيهم فكانوا اول ناس يلفوا و يقفوا وراه. بعدهم الضباع ال كان المهم بالنسبالهم هوه الأكل و خلاص بدل ميبدؤوا ياكلوا فى بعض. الباقى اعترض و مشيوا من حواليه.

الدب زعق

هتيجوا. و على فكره محدش هيقرب من الأكل الهنجيبوه. خليكوا

و بدأت الخطه.

بكره الجزء الخامس

Monday, November 29, 2010

البحيره - الجزء اتالت

الضباع و الأسود جاعوا وده خلاهم بدؤا يتصرفوا بجنون. تلات اسود و كتير من الضباع اتصابوا لما حاولوا يهاجموا الحيونات. الوضع بقى ينرفز. الأسود ابتدت تفقد اعصابها و بدأت تتصارع مع الضباع. و الحيونات زادت فكتير من الحيوانات البتتغذى عليها حست بالحركه دى. الأسود و الضباع استقبلوا حيوانات جديده و منكن تكون خطر على الوضع المتوتر عند البحيره.

الحيوانات زادت على الجانبين و الوضع بقى فى اقصى درجات التوتر. الهجمات العشوائيه زادت لكن حيوانات البحيره اتعودت على رد الفعل الهجومى على اليتعدى الخط الفاصل ال اترسم لواحده بين الفريقان.

الزحمه زادت و الخرفان دارت بين الحيوانات تعلن ان الخطه نجحت و محدش يفرط فى البحيره علشان دى فرصه مش هتتعوض.

وجود الدببه و التعابين و التعالب و الأسود و الضباع برضوا مكانش كفايه. الوضع استمر و الجوع اشتد على اكلى اللحوم. ما بانش حل لحد ما أكبر دب وقف على شجره مكسوره و صرخ بأعلى حسه. كل الحيوانات بصت.

بدأ كلامه بكلمه واحده. انا عندى الحل.

بكره الجزء الرابع

Sunday, November 28, 2010

البحيره - الجزء التانى

الموضوع خد شهر لحد ما جمعوا بعض و معظم الحيونات علشان يرحوا البحيره تانى. الخطة كانت كالتالى: مفيش خطة. كله يمنع اى حد هيهاجم. الحيونات كان عدها اكتر من العادى بس لسه مش كتير.

المفاجأه كانت ان الضباع و الأسود فضلوا واقفين مراقبيين الوضع بس ما هجموش غير كام مره. النمور هاجموا زرافه صغيره على طرف البحيره بس الجاموس الوحشى هاجموهم بشراسه. الموضوع موضوع سيطره و نفس طويل.

السيطره على البحيره بقى حاجه محدش مصدقها من الحيونات و ده خلى كتير من حيونات الغابه يطمنوا للبحيره. اصل فى حيونات جبانه اوى لدرجه انها لازم تشوف حد يجرب المخاطره الأول. لو ما ماتش ال فى الأول ده اشاره تشجيع للحيوانات الجبانه او بمعنى اصح الحيوانات ال عايزه تعيش. خلال ايام و اسابيع و شهور الدنيا اتكربست حيوانات حولين البحيره. محدش كان مكلف بالحراسه بس عددهم كان يخوف اى حد. لحد ما حصلت المفاجأه. الحيوانات اتصعقت لما عرفت الخبر.

بكره الجزء التالت

Thursday, November 25, 2010

البحيره - الجزء الأول


الخرفان و الغزلان اتفقوا ان لازم يلاقوا حل للقتل ال الضباع و الأسود بيعملوا فيهم و فى اخواتهم. الأجتماع مكانش سرى بل عكس كان فى دعايه كبيره قوى بس للأسف ك ال عاده محدش راح. خمس خرفان و غزالتيين بس ال حضروا. الكلام كان كل التالى: الموضوع زاد عن حده و بقى استفزاز و فى عز النهار. احنا مش هنسكت.ديما كلام الخرفان حماسى قوى و جامد. و الغزلان بتتأثر بسهوله و بتعيط و تبهدل الدنيا. من كتر الدعايه للأجتماع الغابه معظمها عرفوا معاده.

   الغابه كان فيها توتر غريب. الأجتماع كان رد فعل. اصل الضباع من كام يوم حاوطيت الغزلان همه و ولادهم و الخرفان و الحمير الزيبرا و الأفيال. اكتر حيونات اتضرت هيه الغزلان مات منهم كتير اوى. مش من الطبيعى انهم يتقابلوا او يجتمعوا لكن بحكم انهم كانوا واقفين بيشربوا و يستحموا فى البحيره ال المطر عملها. الموضوع حصل فجأه و بدون ترتيب. اصل المنظر كان بشع و الكل حس ان ده منكن يحصل لأى حد بعد كده, الكل خاف على نفسه.

كبار و الصغيريين و كله كان فى البحيره بيشرب و يستمتع بالميه لما الأسود حاصرتهم و بدأت هجوم شرس جدا. هجوم مش منظم بس شرس و ساعتها الضباع هجمت الأسود و خدت منهم اكلهم.

الموضوع بقى ملوش حل الكل اتفق بس وصلوا ان الدنيا هتتحل بالتجمع. و طلعوا من الأجتماع مصريين انهم ينشروا الخبر بين الحيونات و التجمع. و بدؤا فى النشر و الدعوه للتجمع علشان يحموا بعض.

بكره الجزء التانى

Wednesday, November 24, 2010

الدين الصح

احنا نلغى البيوت و نخلى البلد كلها جوامع و كنايس بس و حتى المحلات. ايه الكعبله دى الناس بتتنافس على مين الصح و مين الغلط بشراسه. طب ما عمر ما تلاته مختلفيين هايتفقوا.

ارجع ارجع فاضيه وراك. هوب. اقفل مرايتك يا باشا

لما نفضل نرجع للعصور الجاهليه ايه ال هيحصل؟ هنبقى همج. الحروب الصليبيه كانت علشان الدين و الأسلاميه علشان الدين و الهولوكوست علشان الدين و ال بيحصل فى فلسطين علشان الدين. هل الناس كلها اتفقت؟ هل حد ساد؟ هل اتوجد حل؟ 

ارجع يا باشا فاضيه وراك اهى. ارجع. تعال. تعال. هوب

الأديان كلها بما فيهم الأديان الغير سماويه بتدعوا لحاجه واحده. ان الأنسان يبقى كويس. ان الناس متأذيش بعض كده ظلم. مفيش دين بيدعوا للتعذيب او الهمجيه. طب ايه؟ مين ال هيكسب. ولا حد كله هيخسر. 

خلى بالك. خلى بالك. هوب يا باشا اطلع. شفت اديك خبطها. 

  

Thursday, November 18, 2010

هوه مين الذكى؟



ده السؤال ال شغل مخى طول اليوم. هوه الذكى ال يعمل نفسه فاهم و لا الفاهم و مش عايز يبين انه فاهم و لا المش فاهم و مش عايز يبين انه مش فاهم علشان محدش يقول عليه مبيفهمش...


و لا الذكى البيقرا كتير و حاسس انه كده فهم الدنيا؟ و لا الذكى المش ذكى بس بطبيعته بيعمل حاجات محدش يعرف يعملها غيره؟


انا شايف ان لحد النهارده مشفتش حد مش ذكى. كل ال قابلتهم اتعلمت منهم حاجه و حتى لو متعلمتش مشوفتش واحد مش اعلى منى فى حاجه. انا ال يعرف قنوات التلفزيون اكتر منى اذكى منى فى الحاجه دى. و البتعرف تعمل كوريشيه اعلى منى فى الحاجه دى. و العنده عشر سنين و بيلعب بلاى ستيشن احسن منى, اذكى منى فيها. 


مين اذكى حد؟ معرفش  

Wednesday, November 17, 2010

مين ال بنى الأهرام

لما بشوف الأهرام اعلى من اعلى مبنى فى مصر بستغرب, هوه مين بجد ال بناها؟ و بناها ليه؟ و ازاى؟ و احنا لو ال بنى الأهرام اجدادنا ليه مبقناش زيهم و كملنا المسيره؟ 

ليه واحد بس يتبناله قبر بالحجم المهول ده؟ طب لما ده القبر بتاعه احنا بيوتنا الصغيره الضيقه دى لو الفراعنه كانوا شفوها كانوا قالوا علينا ايه؟


طب احنا ايه العلامه ال بتميز بلدنا دلوقتى؟ زمان الفراعنه ميزوا نفسهم, احنا ايه بيميزنا فى الحاضر؟


مش لاقى جواب






   

Monday, November 15, 2010

منكن تكون غلطان

فكرت من فتره,

هوه مش منكن احنا منكونش صح فى حاجات كتير اوى فى حياتنا؟ يعنى مثلا انا طول عمرى فاكر ان مفيش دوله احسن من مصر, و كنت فاكر ان علماء الملسمين كلهم مصريين او عرب (طلع تسعين فى الميه منهم من الفرس ابن سينا (ايران) و الباقى من الأندلس (اسبانيا) ابن رشد), كنت فاكر ان الشرطه موجوده فى البلد علشان تحمينى (الشرطه فى خدمه الشعب) كنت فاكر ان محدش بيكذب و لا حد منكن يوقفنى فى الشارع و يسرقنى علشان ده حرام, كنت فاكر انى لو اجتهدت و اخلصت فى اى شغل هانجح و اعلى (مفيش كوسه)...


لما كبرت و اكتشفت اد ايه منكن حاجه اكون واثق ميتيت فى الميه انها صح منكن تكون ملهاش اى اساس


و ده صدمنى حاسيسنى ان كل حاجه قابله للشك...  

Sunday, November 14, 2010

ياه لو كنت خروف

العيد قرب. و الناس فرحانه. بس انا مش فرحان. اصلى حاطيت نفسى مكان الخروف. أه و الهى. (ال هقوله ده وجهه نظر شخصيه جدا)


فى يوم الهوه يوم العيد بتشد من أرنى - ال هوه راسى و انا بحاول اقاوح بس ازاى؟ الأنسان اقوى منى بكتير. اخواتى جنبى كلهم بيحاولوا يدفسوا راسهم فى بعض و يبعدوا عن الأطراف, اصل معروفه, ال على الطرف أول واحد بيتأذى.


أه فى أكل بس قلبى مش مطمن. الناس ملمومه. أخواتى بتتشد و تدبح قدام الناس. الكل فرحان. انا مش فرحان. انا ال دور هيجى عليه. الدم فى كل حته. كله بيموت. من الخروف الصغير, للكبير, للعجل, للجمل. الأنسان اصله اقوى.


ياه لو كنت خروف


حركت راسى علشان الفكره تروح من دماغى. فكره مرعبه




Saturday, November 13, 2010

ببنيك بحروف


ببنيك فى ظروف
بكلام و حروف
و اعمل معروف
تنسانى لما تتهد

تكرهنى يجوز
ما البنا ده حظوظ
إذ كنت هرم
عملاق او سد

انسان موجود
و بأسم خلود
انت ال تعيش
و البانى يموت

ده كلام و خلاص
كاتبه بأخلاص
كتباتى مدينه
مليانه بيوت

طب ليه ببنيك؟
و بعلى فوقيك؟
ده فى يوم هالقيك
مردوم

الحب, الخير
للناس و الغير
و يا ريت حاجه من دى
تدوم  

كتبها

أحمد مجدى

© Ahmad Magdy - 2010 

Tuesday, November 9, 2010

أم كده بقى

ايوه بحب ماما. بس ليه الأم فى كل حاجه و الأب لأ


امهات الكتب
المسوره الأم


و يقولك مصر


أم الدنيا


و لما تخاف تقول يامى او يا ماما


و حتى فى الشتيمه


#$% امك 
امك كذا و كذا


أم كده بقى. السؤال 


فين دور الأب فى المجتمع؟

Monday, November 8, 2010

لو عايزه تتطلق تدفع للمأذون

من اغرب الحورات ال سمعتها و انا فى تاكسى. كان بيتكلم فى التليفون 


و الهى ما طيقك اصلا انتى ايه معندكييش كرامه؟ لأ العيال دول ولا يهمونى فى حاجه. ايوه اطلقك ده انا نفسى بس انا مش دافع للمأذون. لأ و الهى ما ادفع. خليكى كده. لأ و انا ادفع متيين جنيه ليه انا؟ و منيين؟ والهى ولا انا طايقك و لا عايز اشوف وشك...

و لف الراجل بعد ما قفل التليفون و قعد يشرحلى انه مش ها يطلق مراته علشان "خساره المتيين جنيه في جتيتها" و غيره. انا ما ردتش ولا نطقت


انا كنت مبرق و لسه مش مصدق 


Sunday, November 7, 2010

المخ, ماكنة تصوير

انا عندى منطق انى مش بحب اقلد حد. سعات كنت بعمل كده لحد مقولت "ليه" هوه انا معنديش مخ؟ 


لأ عندى بس فى افكار حلوه بتخليك تفكر تقلدها. طب فى بلدنا للأسف واحد يفتح سنترال عشره يفتحوا زيه. واحد يلبس بنطلون سليم و يبقى شكله نمره (براحته طبعا يلبس الهوه عايزه بس انا من حقى اقول رأيى) كتير يقلدوه لأ و الأوحش انه يتريق على المش لابس زيه و يقول زوقه قديم (أه من حقه يقول رأيه بس مش من حقه يفتكر انه الصح و كله غلط). مثلا البنات فكريين من كام سنه لما الموضه بقت اصفر فى اخصر؟ البنات كلها اتحولت لنسخ من علم البرازيل. و الولاد لما فجأه بقى فى أيموز كتير بقى تقليد من غير ميفهمو هما بيعملوه ليه كده اصلا. و هكذا ده حتى مثلا فاكريين الكلب الكان بيهز راسه و بيتحط على التبلوه بتاع العربيه؟ فجأه انتشر و بقى فى معظم العربيات و السى ديز ال كانت بتتقلب و تتحط على قزاز الميكروبصات. 


فين الأفكار؟ مش معقول معندناش افكار؟ انا لما بقلد بحس انى مخى ملوش اى لذمه. بحس ان مخى مش كمبيوتر مخى ماكنه تصوير 

Saturday, November 6, 2010

انت مش فيير على فكره

ليه لازم يبقى فى واحد اشطر فى الولاد او البنات؟
و بالنسبه لل أسئله الذكيه ال هوه 


مين فيكوا اشطر يا ولاد؟

الولاد: انا انا انا. 


الأهل: طب أيه عاصمه مصر
الولاد يفكروا و واحد يجاوب: طاهره (طفل بقى مش هايقول قاهره)


التانى طبعا ولد او بنت هيفضل طول عمره حاسس ان اخوه او اخته اذكى ماهو بابا العبقرى افتى ان ده سؤال ذكاء


مع ان ال ماجوابش ده منكن يكون بيعرف يرسم احسن من الأول. سعات حجات صغيره بتخلى الطفل يكبر حاسس بالعجز. عمر ده ما هيحاول ينجح فى الرسم ماهو بابا قالها كلمه لو معرفتش عاصمه مصر يبقى انت 


غبى



Friday, November 5, 2010

كول سنتراوى - الجزء التالت

انا زهقت خلاص بجد مش قادره. انا صاحيه النهارده مش قادره انزل.
انتى اقتصاد و علوم سياسيه, ايه ال جابك هنا بس؟
و الهى قدمت فى كل حته. انتى منكن تلاقى ال سى فى بتاعى عند بتاع الفول

انا كنت بلاقى ناس و لا يفرق معاها البتكلم ده مشكلته ايه و لا يفرق هوه اصلا متصل ليه المهم يقفل مبسوط علشان الواحد مش ناقص مشاكل. اصل التعامل فى الكول سنتر ده زى المدرسه بظبط. الدخول بمعاد و منكن واحد اصغر منكن و معوش شهاده زى شهادتك مثلا و انته عارف انه اترقى كوسه و يزعقلك و يقولك انا مش عايز اشوفك ماسك موبيلك على الفلوور (Floor)  الهوه المكان الناس بتعد تاخد الكولز فيه. هيه ستايل مدرسه طول منتا لابس السماعه الكل هايعيش عليك و كله هيزعقلك. الكستمر و السنيور (Senior)  و التيم ليدر او مانجر (Team Leader or Manager) او سوبر فايزر(Supervisor) .  

لأ يبنى والهى مفيش فرق بين المكان ده و غيره كله كول سنترز. بس انت عارف يامان حلمى ايه. كام شهر كده او حته سنه لحد ما اعمل فلوس كويسه و هبدأ البيزنس بتاعى و ابقى مدير نفسى. و على الأقل ابقى بعمل حاجه مفيده و اشوف نتيجه التعب ال بتعبه. اصل النتيجه مش دايما فلوس بس.
يعم ربنا يوفقك. انا بصراحه مستريح هنا نفسى اترقى و اكبر هنا.

Thursday, November 4, 2010

كول سنتراوى - الجزء الثانى

انتا عارف انا وقعت فى ايه فى الكوله (Call) او المكالمه؟
ف ايه؟
معملتش سامرايز للسؤال بتاع  الكستمر
يبنى انت الكوالتى شكلها مستقصداك

انت فى الكول سنتر سماعه. مربوط فى التليفون بسلك السماعه متقدرش تتحرك, او ترد على تليفونك او اى حاجه. هوه فى سماعه بترد على تليفون؟


فى حاجه فالكول سنتر اسمها كواليتى (Quality) او الجوده. دى ناس قاعده بتشوف ال أيجنتس (ال همه احنا) بتقول المعلومات بشكل كويس, بتقول التحيه المحفوظه صح, و بيشفوك بتعامل العميل كويس ولا لأ. الناس دى شغلتها انها تفضل الشخص الحبوب ال ملتزم بقوانين الكول سنتر فى المكالمه و الا هينقصوك و بالتالى مرتبك يقل.  

انا اصلا واخده كورس اميركان اكسنت فى الجامعه الأمريكيه و بيقولك ال أيه عايز يكلم حد امريكى
يبنتى همه الكستمرز كده بيستهبلو هوه مش عاوز مشكلته تتحل و خلاص؟ هوه ماله انا منين. انا اصلا اعدت خمس سنين فى امريكا

للأسف شباب و بنات كتير بيبقى مستواهم عالى قوى على المكان ده بس لأن مفيش شغل هيعملو أيه. مفيش اى حاجه من ال بيدرسوها احنا بنعملها. مش اجمد دوله فى الطب و لا بنبنى اعلى مبانى (زى زمان) و لا عباقره فى الزراعه و لا فى الصناعه مش بنصنع حاجه تدهش العالم و لا فى بترول مثلا. طب ما لو كده, عال بركه, نفتح مدارس كول سنتر و نعلم الأجيال الجديده ترد على التليفونات.


بكره الجزء التالت و الأخير

Wednesday, November 3, 2010

كول سنتراوى - الجزء الأول

هارليس (Release) او ارميه عال هولد(Hold)  لحد ما يقفل. طب لو مأفلش! يادى القرف. ده كاستمر (عميل) غلس بشكل. انت مش متخيل. ده مش عاجبه حاجه.

لو مشيت فى مسيرت الكول سنترز الموجوده فى مصر دلوقتى اكيد هتبقى فاهمنى. لو مشتغلتش او ناوى انا هاشرحلك.
فى السنين الأخيره البلد اكتشفت ان فى شباب كتير قاعد البيت و معاه شهادات زى قلتها هوب بقى بدل ما نعمل مصنع و ننتج حاجه تفيدنا زى الصين كده لأ قررنا نبقى زى الهند, فلبينيات الدول الكبيره. ماهو ده عصر امريكا باشا و عم عثمان الخدام و ده مصر و باقى الدول الناميه. الكول سنتر للميعرفش ده خلية نحل فيها شباب و بنات خريجى مدارس محترمه بيضيعوا عمرهم بيردو على تليفونات البشوات الأمريكان و الأنجيز و الكنديين و الهنود ال فال خليج و غيرهم و غيرهم.

يبنى بعد كده متسكتش اما الكاستمر يشتمك لأ اوعى. بص, قوله ال أندج (ال هيه شكرا لأتصالك بالشركه الفلانيه و اتمناله يوم حلو) بس بقى قول ال أندج تلات مرات و بعديين رلس (يعنى اقفل فى وشه)

الشركات دى بتبقى متعوده على الأسأله البديهيه ال هيه طب هبقى ايه لما اشتغل فى كول سنتر و اعد اتكلم مع عملاء طول الليل و مفيش اجزات فى العيد و لا اى مناسبه. الأجابه: لأن الباشا الكلينت مش بيحتفل بال اعياد دى هوه عنده اعياد تانيه. طب ما بردو مش باخد فى اعياد الدوله ال برد على تليفونتها اجازه.
الأجابه: علشان افرض الباشا عايز يتصل فى الأجازه. من الاخر فى الكول سنتر مفيش اجزات غير يوميين فى الأسبوع و عادى جدا انك تنزل تشتغل فيهم. 
         
طب و ليه الكول سنتراوى يرضى بكده. الأجابه سهله. الفلوس. الكول سنتر بيجيب توكيلات كبيره ف بيدفعوا كتير فال فتافيت البيدفعوها للشغاليين فى المكان بتبقى بالدولار فا كتيره نسبيا. بس طبعا بتتسحل بالفلوس دى.

همه ليه اصلا بيعملوا خدمه العملا بتاعت الشركات الأجنبيه فى مصر؟

علشان لو قلنا مثلا الأمريكى. المواطن الأمريكى مايشتغلش شغلانه زى دى الا لو هياخد مرتب كبير و طبعا بالدولار وليه حقوق و تأمين و كل حاجه فالو اتحسبت هتلاقى مرتب الأمريكى لو اشتغل الشغلانه دى مرتب اد عشرين مصرى او خمسين هندى. طب يبقى الفكره ال توفر للشركات يجى نص او اكتر من ال بتدفعه انها ترمى خدمه العملا فى اى كول سنتر فى الهند او الفلبيين او حاليا مصر. اصل احنا رخاص. و بعديين ايه ال خالا الدول دى تسيب الهند بعد ما كانت طول عمرها عايشه على الشغلانه دى و لسه فيها؟ علشان الهنود الناس ابتدوا يشتكوا من الطريقه البينطقوا بيها الأنجيزى. بس فاقالك غير بقى.


بكره الجزء التانى  

Tuesday, November 2, 2010

هوه ليه فى ناس بتسأل اسأله مش منطقيه؟


هوه ليه فى ناس بتسأل اسأله مش منطقيه؟ يعنى مثلا كنا فى حفله و انا طلعت قدام و فى ايدى كاميرا فيديو علشان اجيب كدر كويس و فجأه واحد سألنى بالراحه كده "هو ممنوع انك تقرب كده. بس لو بتصور اوك. (السؤال الوهمى بقه) هوه انت بتصور؟" معرفتش ارد عليه بس قولتله, انت شايف ايه؟ الراجل سكت و راح يكلم حد تانى. اصل بجد سؤال مش منطقى امال هكون بعمل ايه مثلا, بصتاد؟

مره تانيه راجع و لابس تيشرت كان بتاع مهرجان كده ف عليه ال لوجو فواحد فى الشارع قالى "معاك فانينه من امو بلاش دى؟" بغض النظر عن كلمه "فانينه" حتى لو ببلاش هجيبله منين فى نص الشارع و ازاى و ليه اساسا.

و هكذا انا نفسى بحس انى ببقى عايز اسأل برضو بس الفرق انى مش بسأل همه بيسألوا. بس ليه برضوا ام الفضول ده. حاجه تخنؤ. بس انا قررت ان اليسألنى سؤال مش منطقى افهمه ان سؤاله مفيهوش "سنس" 


مفيش منطق 

Monday, November 1, 2010

ريحت الموت

ايه اصعب منظر شفته فى حياتك؟ انا اصعب منظر هوه منظر الدنيا لما شميت ريحت الموت. ايوه الموت ليه ريحه. 

المنظر الأول:

سواق الميكروباص يوقف فجأه على الرغم ان مفيش اى حاجه قدامه و ينزل جرى فى نص الشارع. انا ببص جنبى الاقى عربيه ميكروباص سته راكب مكسره و واضح جدا انها لسه مخبوطه. و واحد وشه كله دم بشد نفسه من الشباك المكسور و بيحاول يشد جسمه. واحد تانى ممدد فى نص الشارع معلوش دم و شكله بيحاول يمسك ايد السواق ال مسك أيده لكن فجأه ساب نفسه خالص زى الورقه. مع ان شكل جسمه قوى. 

المنظر التانى:

الناس بتتلم على الأجسام المدلدله من شباك الميكروبص و اتنين شالوا الراجل الممدد فى نص الشارع و حطوه على جنب. الناس بتجرى من كل حته و بتتلم حولين المنظر. 

انا فيين؟ انا وقفت جنب الميكربص و مقدرتش اروح. كانت ريحت الموت فى كل حته. هعمل ايه؟ انا ولاحاجه قدام الموت. انا حسيت الموت بيخنقهم واحد واحد براحه قوى. و الناس بتجرى فى كل حته. بس هيعملوا ايه. 

ركبت تانى ميكروباص الشغل و اشتغل التكييف و السواق طلع على الشغل و لحد النهارده ريحت الموت مش عايزه تطلع من منخيرى

Thursday, October 28, 2010

الجمال


شوفت الجمال بطولها الفظيع و جسمها القوى ماشيه بهدوء ورا بعضها و واحد راكب اول جمل فى القطيع وسايق و الباقى وراه. استغربت. اراى الجمال الضخمه دى ال برفسه واحده منكن تقتل بنى ادم ماشيه باستسلام كده ورا الجمل 'المركوب' مفهمتش. الموضوع محير اوى.
و بعديين اما ركزت شويه فهمت و زادت صدمتى. الجمال كانت مربوطه فى ضهر بعض بسلسله حديد صغيره. بس دى سلسله صغيره, 

بس لسه للأسف الجمال القويه ال أد ميت بنى ادم مقتنعه ان البنى ادم اقوى منها و انهم مربوطين.

Wednesday, October 27, 2010

ايوه اسمها القاهره علشان بتقهرنا


ايوه القاهره معناها البتقهر الناس و بتقهر احلامهم. ايوه بتقهرنا. هتقولى احنا ال خليناها كده, طيب ما البلد كلمه بتدل على الشعب, ال هو احنا. يعنى مكانش فى مصر فاضيه متشطبه و احنا اشتريناها. مصر يعنى احنا. المشكله ان فى لغتنا العربيه احنا دايما دايما بنرمى اللوم على اى حاجه الا احنا. يعنى لو قلمك ضاع بنقول:


القلم ضاع . ليه منقولش الحقيقه انا ضيعت القلم. فى ال أنجليزى بتتقال
I lost my pen
انا فقدت القلم. فى انا فى الموضع.

و للأسف احنا بنقهر فى بعض. و الناس بتقهرنا بره. طيب هيه مصر امتى قهرت اى حد. احنا كله قهرنا.

الأتراك, الأنجلير، الفرنسيين. كله و دلوقتى المصريين بيقهرو بعض. انا رأيى كفايه اى كلام احنا نغير اسمها بلاش المقهوره علشان منظرنا قدام الدول. احنا نسميها الصامده مثلا اسم جميل بس مفيهوش تحوير.

Monday, October 25, 2010

عاور تتجوز؟ - للرجال فقط

عاور تتجوز؟ طب جهز دول

مبدئيا انا بتكلم عن الناس المفيش عندهم بابا و ماما بيدفعوا

قبل اى حاجه
200.000 شقه
جنيه (اقل من كده هتبقى منطقه مش حلوه و هتتبهدل انت و مراتك)

عفش و شبكه و مهر مش هقولك قدهم لأ يسيدى
100.000 بس
و اكيد فى فرح و خطوبه قول
30.000

و عربيه تشيلك انته و هيه بدل البهدله فى المواصلات
قول
80.000
يعنى بالفرش و كله بنكلم فى ربعمييت الف...

طب لو واحد بياخد مش الف لأ الفين فى الشهر فى اتناشر شهر ب
24.000

قول حوشت المرتب كله لمده عشر سنين
240.000

طيب فكر لو كمان عشره
480.000

يبقه فى الأربعيين هيبقه هدفك هيتحقق على اول الخمسين, هتبقه جاهز و مستعد و لو هتقولى تترقا او فلوس تزيد هقولك منا بقول هاتحوش المرتب كله مش نصه ولا ربعه.
طب جميل, خمسين سنه بقه هتبدأ متأخر فتحاول تخلف بسرعه قدامك عشر سنين يا مان و تطلع عل معاش. ياسلام لو خلفت, غير الرعايه و المستشفيات ادخل عل حضانه و المدرسه. اقل مدرسه بتمن تلاف جنيه و على المستقبل هتبقى التمن تلاف دى متدخلش مدارس حكومه. الحسبه بتكبر و تكبر و لو فكرت فيها بلاقى الراجل فى الجواز ماكنه تصنيع فلوس.

لأ بجد فى ناس بتسيب الحسبه للأيام و فى ناس بيدخلوا بصدرهم و يسبوها على الله. 

و بتقولوا الولاد كفرانه ليه... الموضوع حسبه كبيره

Saturday, October 23, 2010

مفيش حرس جامعه من النهارده - احمدك يا رب

شفت خبر فى التلفزيون بجد كان نفسى اشوفه طول عمرى, الظباط بتوع حرس الجامعه (مش كلهم طبعا) ال بيعاكسوا البنات و ال بيدخلوا ولاد الباشا و ولاد البيه خلاص بخ مش هيبقوا موجوديين. كان اى اتنين يتخنقوا خناقه عاديه بدل ما الجامعه تعاقبهم او تفصلهم, يتعملهم محضر و يروحوا القسم وش. بجد يارب الموضوع يتنفذ فى باقى الجامعات. هو اتحكم نهائى فى جامعه القاهره عقبال الباقى. 

وياريت مندخلش فى قصه ابن العميد و قريب الدكتور و القصص دى مع ان ده المتوقعه بس ده احسن من انى الاقى ظابط بيوقف طالب و يعيش عليه فى مكان دراسته ما كفايه الشارع و المرور. و بعديين ده مكان تعليم ال يعمل حاجه غلط يتعاقب انه يسقط يتفصل لكن مش يتسحل عل القسم.

بجد انا سعيد اوى بالحكم ده و نفسى يتطبق فى جامعه القاهره بعد الحكم و عقبال باقى المحافظات

Thursday, October 21, 2010

غلطان ال يقول ان البنات مش اذكيا. غلطان اخر حاجه

هوه ليه فى ناس بتقول على البنات هايفه, اجوب انا, علشان بيضيعوا وقتهم فى لبس و بيشتروا كتير. و بيقولك كمان اما بيكبروا بيجيبوا فى سيرت الناس و يوعدوا يحكوا عن دى و دى.

طب هوه ليه انا مش شايف كل ده هيافه او قلت ذكاء! هقول مثال. طب هوه ليه البنات متبعيين قصص اصحابهم (ال بنسميه نميمه) طب ما انا شايف ان ده ذكاء. هات اى قصه و قول لبنت و لولد هاتوا اصلها او مين ال عملها و امته و فين. مين هيجيبلك أرارها الأول؟ طب و هوه ده مش ذكاء؟ ده معناه ان البنت لو فكرت فى حاجه هتجيبها و مش هتسيبها. الولد بيزهق بسرعه و منكن فجأه يرمى كل حاجه و ميكملش. ال مش كده فى الولاد همه طبقه العلماء.

طب شوف جدك و جدتك لو عايشين. هتلاقى جدك يأمه ساكت و بيقرا الجرنال و بيتكلم فى الماضى او بيقول قصص قالها ميت مره. الست الكبيره بقه هتلاقيها عارفه مين اتجوزت و مين اطلقت و عندها اسعار الخضار و الفاكهه. عمرك ماهتلاقى جدتك مخها مش شغال. و ديما متابعه ايه الجديد. انا شايف ده حاجه مش عاديه.

المجتمع خلاص اقنع كتير من البنات انهم مجرد جسم لازم يتزين اوى علشان الراجل يشتريه. المجتمع اقنع البنت ان كل ال بيعملوه هايف و ملوش قيمه و انهم مش اذكيه زى الرجاله. المشكله الأكبر ان فى بنات اقتنعت ب كده.